Top

PN aprova votu pezár ba falesimentu Ministru Amândio ho unanimidade

Ministru Justisa, Amândio de Sá Benevides. Imajen Tatoli/Francisco Sony

DILI, 23 janeiru 2024 (TATOLI)—Parlamentu Nasionál (PN), tersa ne’e, liuhosi reuniaun plenária aprova votu pezár ba falesimentu Ministru Justisa (MJ), Amândio  de Sá Benevides, ho votu unanimidade.

Notísia Relevante: Membru PN hato’o sentidu kondolénsia ba falesimentu Ministru Amândio de Sá Benevides

“Rezultavu votasaun a-favór 60, kontra no abstensaun 0, nune’e, votu pezár pasa,” Prezidente Parlamentu Nasionál, Maria Fernanda Lay, fó sai iha sala plenária.

PN aprova votu pezár ne’e hodi hato’o profundu sentidu kondolénsia ba falesiemtnu Ministru Justisa no matebian nia kaben no oan ki’ak sira inklui família, no partidu CNRT ne’ebé lakon nia kuadru importante ida.

Amandio dé Sa Benevidas moris iha 16 jullu 1964 iha munisípiu Ainaro. Nia ramata nia lisensiatura iha Direitu Konstitusionál iha universidade Nusa Cendana Kupang, Kupang–Repúblika Indonézia.

Iha 1990, nia fila-fali mai Timor-Leste hodi serbisu nu’udar advogadu privadu iha Dili, atividade profisionál ida-ne’ebé nia hala’o husi tinan 1991 to’o 1993.

Iha Dili, nia nu’udar funsionáriu públiku hosi tinan 1993 to’o 1999 Timor-Leste ukun rasik aan liuhosi referendu 30 agostu 1999. Durante períodu ida-ne’e, nia hala’o kursu oioin iha área administrasaun no jestaun públika.

Durante administrasaun tranzitóriu Nasaun Unida nian (UNTAET), nia sai hanesan Ministériu Públiku Timor-Leste nian dahuluk ida-ne’ebé iha pozisaun iha Administradór, Sergio Vieira dé Mello nia oin, iha fevereiru 2000.

Nia hetan nomeasaun nu’udar advogadu jerál ba krime komún iha loron 16 fulan-outubru tinan 2001, hodi troka Longuinhos Monteiro, ne’ebé asume pozisaun nu’udar Prokuradór Jerál.

Maske hetan nomeasaun durante períodu UNTAET, ho aprovasaun ba dekretu-lei nú. 1/2002, iha rejime transferénsia sistema judisiáriu nian, nia nafatin iha pozisaun to’o 2005.

Iha tinan ne’ebé hanesan, nia ramata ona kursu pos-graduadu iha estudu anti-korrupsaun iha fatin universidade iha Hong Kong, Repúblika Populár Xina.

Entre tinan 2004 no 2005, nia kaer pozisaun nu’udar Komisáriu Komisaun Nasionál Eleisaun (CNE).

Iha loron 01 fulan-jullu 2023, nia hetan konfiansa hosi Primeiru-Ministru, Kay Rala Xanana Gusmão, hodi asume mós responsabilidade hanesan Ministru Justisa (MJ).

Deputadu FRETILIN, Aniceto Guterres, hateten hanesan jurista hatene di’ak saudozu durante iha tranzisaun UNTAET nian ne’e, ninia konstribuisaun boot ba estabelese sistema justisa iha Timor-Leste.

Nia dehan, iha esperansa boot tebes ba saudozu bainhira tinan kotuk nia simu pose hanesan membru Governu, nia bele kontribui no bele hadi’a di’ak liután sistema justisa iha nasaun ne’e.

“Ha’u akompaña mós ninia serbisu ema ida koñese di’ak área ne’e, hatene sasán no nia koñese di’ak sistema justisa. Nia hatene mós dezáfiu setór ne’e, maneira ita bele haree no membru Governu kompetente iha ninia área. Tanba ne’e, lori ha’u-nia naran no família ho bankada FRETILIN nia naran hakarak espresa sentidu kondolénsia ba família saudozu nia kaben no oan, no família tomak no ba partidu CNRT hanesan kuadru kompetente, liuliu Estadu lakon nia ema kompetente ida,” nia dehan.

Deputada CNRT, Cidalizia dos Santos, hato’o sentidu kondolénsia ba família no Partidu CNRT ne’ebé lakon ema kompetente ida.

Notísia Relevante: Ministru Justisa Amândio hakotu iis

Jornalista : Nelson de Sousa

Editór        : Cancio Ximenes

Publisidade

Leave a Reply

Latest Post

error: Content is protected !!