DILI, 22 janeiru 2024 (TATOLI)—Membru Parlamentu Nasionál (PN) iha uma fukun Parlamentu Nasionál hato’o sentidu profundu kondolénsia ba falesimentu Ministru Justisa (MJ), Amândio de Sá Benevides.
Notísia Relevante: Ministru Justisa Amândio hakotu iis
“Ha’u hakarak hato’o sentidu kondolénsia ba Amandio de Sá benevides, selamat jalan, pas no dame hela nafatin ho ita,” Deputadu Conselho Nacional de Reconstrução de Timor (CNRT), Romeio Moises, hato’o liuhusi intervensaun iha reuniaun plenária PN, segunda ne’e.
Deputada PD, Rozena Fátima Martins, lori nia naran pesoál no Partidu Demokrátiku hato’o profundu sentidu kondolénsia ba falesimentu Ministru Justisa, nu’udar servidór Estadu no hanesan mós rekursu ida kualifikadu iha nasaun ne’e, ho orasaun akompaña atu hetan fatin di’ak iha Nai Maromak nia kadunan santu.
Deputadu FRETILIN, Antoninho Bianco, hato’o mós sentidu kondolénsia ba família enlutada, no hato’o orasaun hodi akompaña matebian atu hetan fatin kmanek iha Nai nia kadunan santu.
Deputadu FRETILIN, Aniceto Guterres, husu meza PN atu reuniaun plenária ohin, bele inklui ajenda hosi Parlamentu Nasionál atu PN pasa aprova votu pezár ida ba falesimentu Ministru Justisa, tanba sente importante tebes.
“Ha’u lahatene, tanbasá mak ohin la inklui iha ajenda, enkuantu Ministru mate iha sábadu, ohin devia ita inklui, mós atu halo funeral. Di’ak tebe-tebes kuandu antes funeral, Parlamentu pasa nia votu pezár, se liu tiha funerál parese ladún di’ak, se bele inklui ohin,” nia hateten.
Notísia Relevante: PM Xanana sente triste tanba lakon membru Governu potensiál ida
Prezidente Parlamentu Nasionál, Maria Fernanda Lay, hato’o agradesimentu ba hanoin di’ak hosi Deputadu FRETILIN ninia sujestaun kona-ba votu pezár, maibé matebian ninia biográfia de’it PN seidauk iha.
Ne’ebé, nia dehan, hanoin mate derepente loos iha sábadu, maibé votu pezár PN bele prepara didi’ak ho textu no nia istória, nune’e fiar Governu iha nia biográfia hodi bele PN halo korresaun.
Dala barak mate liu tiha, PN foin aprova ideál maibé situasaun la ideál, tanba hosi PN rasik tenke kontaktu sira-nia família ho sira seluk prepara.
“Ne’ebé, hanoin ideál tebes, ita bele bele aprova iha momentu ezatu maibé bazea ba biográfia. Ne’ebé, orsida sei lee iha semitériu ne’e, ita bele foti. Dala ida tan, agaradese ba hanoin di’ak hosi Deputadu Aniceto Guterres, maibé infelismente ita laiha preparasaunAjenda reuniaun plenária ne’e, ita prepara tiha kedas iha sesta-feira, maibé posivél ita atu aprova ohin, posivelmente aban,” nia hateten.
Notísia Relevante: Família sentre triste lakon Ministru Amândio Benevides
Jornalista : Nelson de Sousa
Editór : Cancio Ximenes
