DILI, 23 janeiru 2024 (TATOLI) – Sekretariu Estadu Arte no Kultura (SEAK) Jorge Soares Cristovão, relata, programa prioridade ne’ebé SEAK sei dezenvolve iha tinan 2024 mak kultura no arte.
“SEAK hakarak dezenvolve mak kultura no patrimoniu ho nia sub programa tolu mak hanesan dezenvolvimentu kriatividade arte no kultura, promove identidade kulturál no dezenvolvimentu infraestrutura kulturál,” hatete Governante ne’e ba Agência TATOLI iha Faról Dili, tersa ne’e.
Notisia relevante: SEAK nomea Maria Madeira reprezenta TL bá partisipa expo iha Italia
Hosi sub programa tolu ne’e mai ho nia atividade lubuk ida liuliu kona-ba dezenvolvimentu kulturál iha Timor-Leste.
“Dezenvolvimentu kriatividade patrimoniu kulturál ita iha atividade lubuk ida ne’ebé atu dezenvolve ita nia kriatividade arte no kultura iha ita nia sosiedade mak ita iha mós polítika atu fó formasaun ba joven sira, estudante sira atu koinese didi’ak dezenvolvimentu kriatividade arte kultura, ida ne’e mak ita sei implementa iha tinan ida ne’e,” hatete Jorge.
Tuir nia, iha sub programa tolu sei haree oinsa atu dezenvolve mós situs istóriku sira iha Timor-Leste ne’ebé identifikadu ona.
Iha dezenvolvimentu infraestrutura kulturál SEAK tau ona orsamentu iha fundu infrastrutura atu harii sentru kulturál iha munisípiu Lautem.
“Ita tau prioridade ba munisípiu Lautém tanba nia uma adat hahú kedan iha tempu okupasaun Indonézia uma adat Lautem nian mak reprezenta hanesan uma adat nasionál, iha tinan hira ba kotuk ema deskoinesidu balu sunu tia uma adat ne’e, entaun polítikamente ami hakarak harii fila fali, tanba uma adat ne’e mak sei reprezenta uma adat Timor-Leste nian,” nia salienta.
Alende ne’e, SEAK mós kontinua halao atividade interkambiu kulturál fronteira ne’ebé ho modelu hanesan tinan kotuk realiza ona iha munisípiu Bobonaro ne’ebé partisipa hosi komunidade viziñu Indonezia.
“Interkambiu kulturál ida ne’e tama ona hanesan atividade anuál ba SEAK no servisu hamutuk ho Sentru Nasionál Chega (CNC-sigla portugés), ho objetivu atu promove identidade kulturál no hametin relasaun entre komunidade sira iha área fronteira,” nia konklui.
Enkuantu, orsamentu tinan 2024 SEAK nian hamutuk ho Ministériu Juventude Desportu Arte no Kultura (MJDAK) ho totál $8.451.773.
Hosi total ne’ebé iha aloka ba saláriu vensimentu $2.721.048, vens servisu korrentes $ 1.150.005, transferensia públiku $ 3.834.737 no kapital dezenvolvimentu ho $745.983.
Notisia relevante: SEAK kompromete kontinua apoia no promove joven kreativu ba arte
Jornalista : Hortencio Sanchez
Editór : Florencio Miranda Ximenes
