iklan

BOBONARO, HEADLINE, MUNISÍPIU, SAÚDE

Postu Saúde balun iha Cailaco reativa atendimentu kada semana

Postu Saúde balun iha Cailaco reativa atendimentu kada semana

Xefe Sentru Saúde Komunitária Postu Administrativu Cailaco, Anina Afonso Gonxalves. Imajen Tatoli/Sérgio da Cruz.

BOBONARO, 25 janeiru 2024 (TATOLI) – Sentru Saúde Komunitária (CCS, sigla portugés), postu administrativu Cailaco, munisípiu Bobonaro, kria ona oráriu hahú semana kotuk ne’e halo vizita ba postu saúde sira-ne’ebé taka hodi reativa atendimentu saúde ba komunidade sira kada semana.

Xefe Sentru saúde Cailaco, Anina Afonso Goncalves, rekoñese postu saúde hitu hanesan Daudu, Atudara, Purugua, Bilimau, Genulai, Goulolo no Manapa taka provizoriu ka la halo atendimentu ba pasiente sira ho razaun laiha pesoál saúde.

Notísia relevante: Postu Saúde haat iha Bobonaro taka provizóriu

“Ita iha postu saúde sia, foin lalais postu saúde rua Asulau no Genulai mak loke, postu saúde hitu mak taka, tanba pesoál saúde kontratu termina ona, entaun meiu ne’ebé ami halo, bazea ba orientasaun hosi munisípiu ami loke postu saúde sira taka ne’e dala-de’it, médiku, parteira, enfermeiru, ami vizta dala-ida, tuir oráriu segunda iha Daudu, tersa iha Purugua, tuir oráriu ne’ebé ami tau ona,” nia informa ba jornalista sira iha Bobonaro, kinta ne’e.

Nia dehan, Ministeriu Saúde deside bolu fila-fali pesoál saude na’in-hitu iha Cailaco ne’ebé ho estatutu kontratadu regulár ho Orsamentu Jerál Estádu, atu reativa funsaun normál hodi apoia servisu iha baze.

Responsável sentru saúde ne’e hatutan, durante ne’e parte sentru saúde sempre hetan krítika hosi komunidade no autoridade lokál tanba atendementu saúde ladún másimu.

“Sira sempre husu bainhira mak atu destaka fali pesoál saúde sira, ha’u hanoin ne’e la’ós kompeténsia ami-nia, ha’u só esplika ba sira prosesu agora la’o hela, ita espera semana ida-ne’e ho semana oin, pesoál sira-ne’ebé tuir vaga rekrutamentu ne’e Ministeriu Saúde bele destaka mai fasilidade sira mamuk, sira ida kontratu remata ne’e mós agora sei servisu voluntáriu, maibé iha sentru de’it, ami la haruka sai ida,” nia hateten.

Xefe sentru ne’e hakle’an, bainhira akontese kazu emerjénsia no maternidade sira sempre fasilita ambulánsia ba tula pasiente-sira, maske ho kondisaun klima no estrada ladi’ak.

“Ita-nia postu saúde hanesan Genulai no Goulolo ne’e karreta sei ba to’o di’ak, kuandu udan-boot sa’e atu ba Da-udu ne’e mota, entaun sira lori mai besik iha-ne’e mak ami ba hasoru, sira parte Atudara nia fali, bainbain ami komunika ho sentru saude Maliana mak ba foti sira ho Raiheu nian, liuhosi Hali-Mesak,” nia katak.

Administradór postu administrativu Cailaco, Alfredo Meta, observa durante ne’e komunidade balu moras hakbesik ba fasilidade saúde laiha pesoál ida mak atende.

Ho preokupasaun ne’e, nia husu ba Ministeriu Saúde atu aselera prosesu rekrutamentu nune’e iha tempu badak bele destaka fali pesoál saúde foun hodi fó asisténsia saúde ba komunidade ne’ebé moras.

“Ida-ne’e ita ko’alia kona-bá ema-nia vida, nasaun ida atu hamriik ba oin no forte, presiza ema ne’ebé ké saúde di’ak, edukasaun no saúde ne’e importante, tanba ema tenke iha saúde ne’ebé ké di’ak hodi fó edukasaun ne’ebé diak ba ita-nia oan sira,” nia hateten.

Tuir informasaun ne’ebé Agência Tatoli rekolla iha terrenu, katak daudaun ne’e estoke ai-moruk iha sentru saúde Cailaco sufisiente hela atu atende pasiente sira ho moras oinoin.

Tuir dadus 2022 postu administrativu Cailaco iha aldeia 24, suku hitu ho totál populasaun 10,347, komposta hosi feto 5101 mane 5,246 ho totál xefe família 2,107.

Notísia relevante: Postu saúde sira iha Bobonaro menus rekursu umanu no ekipamentu médiku

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!