DILI, 26 janeiru 2024 (TATOLI)–Ministra Finansa, Santina José Rodrigues Viegas Cardoso, husu ba dirijente no funsionáriu Autoridade Aduaneira (AA)/Alfándega atu hala’o knaar ho profisionál no transparente hodi rekolla taxa ba kofre Estadu.
Ministra ko’alia kestaun ne’e iha ámbitu selebrasaun loron mundiál Alfándega no aniversáriu Alfándega Timor-Leste ba dala 24, ho tema ‘Alfándegas nu’udar mobilizadór husi parseiru tradisionais no parseiru foun ba objetivuu ne’ebé klaru ka transparente’, iha Auditorium Ministériu Finansa, Aitarak-laran, sesta ne’e.
“Ho tema ba aniversáriu tinan-ne’e nian, ita ko’alia kona-ba transparénsia, relasaun, kontribuisaun Alfándega ein termu rekolla reseita nomós dala barak ita sempre ko’alia katak Alfándega hanesan área ne’ebé risku mós. Ha’u hatene katak dala barak mós Alfándega sai hanesan alvu, liu-liu persepsaun públiku nian, tanba servisu Alfándega ne’ebé mak risku, entaun presiza liu promove transparénsia iha servisu loron-loron no promove profisionalizmu iha servisu fatin, dala barak ita ezije profisionalismu maibé iha parte seluk iha mós limitasaun ka lakuna ne’ebé instituisaun seidauk valoriza ho di’ak,” Ministra Santina, hateten.
Governante ne’e agradese tebes ba esforsu funsionáriu Alfándega, servisu, no kooperasaun ne’ebé mak durante ne’e halo no nafatin hamutuk atubele kontribui servisu ne’ebé halo durante ne’e, liu-liu rekolla reseita. Rekoñese mós katak Alfándega Timor-Leste dala barak hasoru difikuldade barak hanesan ekipamentu, treinamentu, no balun servisu iha área fronteira inklui dook hosi família.
Nune’e, Ministra Santina kompromete sei tau-matan ba Autoridade Aduaneira, liu-liu kareira funsionáriu sira nian, maibé buat ida ne’ebé importante liu mak iha servisu sira loron-loron nian maka oinsá garante katak sasán ka komérsiu ne’ebé tama Timor-Leste bele prevene buat sira ne’ebé fó risku ba saúde no seguransa nasionál no evita sasán ilegál.
Notísia relevante : Alfándega Mota-Masin husu sidadaun sira importa motór tuir dalan legál
Maski nune’e, Ministra Santina rekoñese katak dala barak situasaun sira ne’e mosu kauza hosi falta fasilidade, rekursu no kapasitasaun bele kauza persepsaun. Tanba ne’e maka ita hotu tenke kumpre dever no servisu ho profisionál hodi fó garante ba públiku katak área ne’ebé ita servisu ba risku no nu’udar autór prinsipál iha odamatan boot atu hatama sasán bele garante duni katak sasán sira ne’ebé la’ós labele tama no bele garante duni katak ema hotu tenke kumpre lei no ita hotu iha integridade atu hala’o servisu.
Iha biban hanesan, Komisáriu AA, José António Fátima Abílio, relata, Alfándega durante ne’e la servisu mesak maibé hamutuk ho parseiru sira tantu nasionál hanesan setór privadu nu’udar importadór no internasionál bainhira tama ona iha faze dijitalizasaun.
“Ba oin oinsá hametin liután kooperasaun ho instituisaun relevante ne’ebé haree kona-ba kestaun fronteira. Tanba ne’e maka atu garante transparénsia durante prosesu tranzasaun komérsiu maka kria ona sistema sira hanesan janela únika hodi fasilita prosesu sira no ajuda halo kontrolu atubele transparente liu,” nia tenik.
Esforsu seluk ne’ebé Alfándega halo maka liga ho ekipa konjunta hodi halo patrullamentu hodi minimiza atividade ilegál. Iha parte seluk tenke halo konsensializasaun ba komunidade katak atividade negósiu livre ba sidadaun hotu, maibé tenke kumpre prosedimentu ne’ebé vigora, atu nune’e labele fó risku ba an no afeta fali ba Estadu no ema seluk.
Aniversáriu Alfándega ne’e realiza ho atividade workshop ne’ebé oradór mai hosi Ministériu Públiku ho tópiku prosesu kategoria krime ba libertasaun merkadoria ilísitu sira tuir kódigu prosesu penál. Oradór seluk mak mai hosi Polísia Nasionál Timor-Leste, Unidade Patrullamentu Fronteira (UPF), ho tópiku papel UPF iha liña fronteira ba kombate atividade ilísitu hodi asegura reseita Estadu. Enkuantu oradór ikus mai hosi Alfándega rasik ho tópiku Alfándega mak mobilizadór no transparente iha dezempeñu ba pareiru ekonómiku sira hodi kontribui ba reseita Estadu.
Jornalista : Antonia Gusmão
Editora : Julia Chatarina
