Deputadu KHUNTO husu Governu reativa prizaun antigu Weberek
DILI, 29 janeiru 2024 (TATOLI)—Vise bankada KHUNTO iha Parlamentu Nasionál (PN), Deputadu António Verdiál de Sousa, rekomenda ba Governu atu bele reativa prizaun antigu Weberek-Alas Manufahi.
Notísia Relevante: 2023, MJ prevee orsamentu konstrui prizaun iha Manufahi
“Rekomenda ba Governu atu reativa prizaun Weberek Alas Manufahi, atu nune’e iha orientasaun oinsá ita-nia prizioneiru sira labele han toba de’it. Ho nune’e, reativasaun ba prizaun Weberek, prizioneiru sira bele aprende serbisu oinsá halo toos hodi hatene kee rai, kuda aihan no bele halo kolleta no labele aprende de’it kustura no tein iha prizaun laran maibé mós aprende serbisu fizíku nian,” Deputadu Verdiál hato’o luihosi deklarasaun polítika iha reuniaun plenária PN, segunda ne’e.
Tuir dadus hosi parte tutela katak, daudaun ne’e prizoneriu sira iha prizaun Becora hamutuk 432 kompostu hosi kondenadu 347, preventiva 85 no prizaun Gleno iha dadur 107 mesak dadur kondenandu, no prizaun Vovalima iha dadur 105 ho kondenadu 87 no preventiva 18, nune’e totál hosi prizaun tolu hamutuk 644 ne’ebé kompostu hosi feto no mane, ema estranjeiru no dadus juvenil.
Membru órgaun lejislativa ne’e hateten, dadus ne’e Governu persiza harii fatin rasik ba feto sira no sentru detensaun ba foinsa’e sira, harii fatin prizional foun hodi bele fasilita prizioneiru nune’e ho saudável.
Prepara médiku ne’ebé kualifikadu hodi fo asisténsia psikolójika ba ema dadur sira, hadi’a planu nasionál ida atu haree ema-ne’ebé iha saúde mentál tanba dadur balun mós iha hela saúde mentál.
Hametin edukasaun la’ó edukasaun formal, alfabetizasaun no hala’o treinamentu vokasional ba ema-dadur sira, liuhosi promosaun ba sertifikasaun ka akreditasaun ba kursu atu bele hala’o reintegrasaun ida ho susesu bainhira sira reintegra fali ba iha komunidade ka família.
Nia husu aumenta fasilidade transporte ba guarda prizionériu sira hodi tula dadur bainhira iha notifikasaun aprezenta dadur iha Tribunál.
Iha sesaun plenária ne’e, Vise Ministru asuntu Parlamentár, Adérito Hugo da Costa, agradese no apresiasaun aas tebes ba iha kontinuasaun no pozisaun krítiku husi bankada parlamentár sira nian ba Governu iha intervensaun plenária, nune’e rejista preokupasaun sira ne’e hotu sei hato’o ba ministériu tutela.
Notísia Relevante: Planu estabelesimentu Prizaun Weberek la tama iha programa Governu
Jornalista : Nelson de Sousa
Editór : Cancio Ximenes
