iklan

BOBONARO, HEADLINE, MUNISÍPIU, SAÚDE

Postu Saúde lima iha Balibo funsiona normál

Postu Saúde lima iha Balibo funsiona normál

Xefe Sentru Saúde Komunitaria Postu Administrativu Balibo, Doutór Napoleão Marques. Imajen Tatoli/ Sérgio da Cruz.

BOBONARO, 30 janeiru 2024 (TATOLI) – Postu saúde lima ne’ebé eziste iha postu administrativu Balibo, munisípiu Bobonaro funsiona no halo atendimentu saúde ba pasiente sira normál hela, daudaun ne’e enfrenta hela problema menus rekursu umanu.

Xefe Sentru Saúde Balibo, Napoleão Marques, hateten foin lalais ne’e iha pesoál saúde kontratadu hosi Programa Saúde bá Família (CNF, sigla portugés) no programa Covid-19 nian hamutuk na’in-16 mak kontratu termina iha 31 dezembru 2023 no Ministeriu Saúde deside la estende.

Tuir nia, desizaun refere la fó implikasaun maka’as ba atendimentu saúde tanba sei iha funsionáriu permanente sira kolokadu iha postu saúde lima hanesan Leohitu, Sanirin, Leolima, Batugade no postu saúde Cowa.

“Sira-ne’ebé para ne’e hamutuk 16, maibé ita-nia atendimentu iha postu saúde lima agora la’o normál hela, tanba ita-nia médiku, parteira no enfermeiru sira sei sufisiente hela no halo hela sira-nia kna’ar hanesan bainbain,” nia informa ba Jornalista sira iha Balibo, segunda ne’e.

Konabá estoke ai-moruk, nia dehan, daudaun ne’e sei sufisiente hela atubele atende pasiente sira-ne’ebé moras.

Maske postu saúde sira funsiona normál, maibé atendimentu saúde ba pasiente sira ladún másimu tanba daudaun ne’e  tempu udan komunidade barak mak moras ho  kazu Infeksaun Respiratóriu Aguda (IRA), diarreia no dengue rejista aas iha fulan ne’e.

Nia espera Ministériu Saúde bele rekruta fali pesoál saúde tuan sira-ne’ebé iha ona esperiénsia servisu.

“Sira funsionariu kontratadu ne’ebé servisu iha ne’e kuaze tinan tolu ba leten hotu ona, entaun sira-ne’e iha ona kapasidade, tuir ona treinamentu lubuk ida, ita lakon ona osan barak ba sira, tanba sira iha ona esperiénsia, ita la presiza ona hanorin ezemplu uza kanula ba pasiente sira,” nia katak.

Administradór postu administrativu Balibo, Amilcar Tavares, agardese ba Ministériu Saúde ne’ebé loke ona vaga foun, maibé nia rekomenda atu halais prosesu rekrutamentu, tanba daudaun ne’e povu presiza tebes  hetan tulun ba asisténsia saúde.

“Ita rekomenda reativa fali Saúde na Família, atu nune’e hamenus kazu mortalidade iha Balibo, karik sira la mai, problema ita-nia komunidade. Ha’u hanoin se bele lalais, tanba saúde importante ba ema–nia vida, se ita husik mak labele salva, ita-nia komunidade mak nafatin sai vítima.”

Funsionariu permanenti ne’ebé destaka iha Sentru Saúde Balibo no postu saúde lima hamutuk na’in 30-resin.

Notísia relevante: Sentru Saúde Balibo laiha estoke kombustível ba Ambulánsia

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!