iklan

OÉ-CUSSE (RAEOA), POLÍTIKA

PN husu estrutura foun RAEOA-ZEESM serbisu makaas

PN husu estrutura foun RAEOA-ZEESM serbisu makaas

Primeiru-Ministru, Kay Rala Xanana Gusmão, fó pose ba Prezidente Autoridade Rejiaun Administrativa Espesiál Oé-Cusse Ambeno, Rogério Tiago Lobato, iha Ótle de Ambeno Oé-Cusse, kuarta (31/01). Imajen Media GPM.

DILI, 31 janeiru 2024 (TATOLI)—Parlamentu Nasionál (PN) dezeja estrutura foun Autoridade Rejiaun Administrativa Espesiál Oé-Cusse Ambeno hamutuk ho Komisaun Zona Espesiál Ekonómia Sosiál Merkadu Timor-Leste ne’ebé ohin simu pose mandatu tinan lima, atu serbisu makaas hodi kontinua garante kontinuasaun dezenvolvimentu iha Oé-Cusse.

Notísia Relevante: Xanana Gusmão fó pose Prezidente Autoridade RAEOA no Koordenadór ZEESM foun

“Ha’u espera katak estrutura foun tenke di’ak0liu duke anteriór,” Prezidente Parlamentu Nasionál, Maria Fernanda Lay, hateten ba jornalista sira iha uma fukun PN, kuarta ne’e.

Deputadu hosi bankada CNRT, Natalino dos Santos, hakarak parabeniza ba estrutura foun Autoridade Rejiaun Administrativa Espesiál Oé-Cusse Ambeno (RAEOA) hamutuk ho Komisaun Zona Espesiál Ekonómia Sosiál Merkadu (ZEESM) ne’ebé ohin simu pose.

“Prezidente autoridade ho ninia ekipa dezeju susesu oinsá atu bele garante kontinuasaun dezenvolvimentu ne’ebé iha tiha ona hosi Prezidente na’in-rua, atu ba kontinuasaun prosesu,” nia hateten.

Membru órgaun lejislativa ne’e husu ba Prezidente Autóridade RAEOA atu tenke asegura dezenvolvimentu laiha diskriminasaun no labele partidariza ba burokrásia administrasaun no labele iha familiarizmu iha implementasaun projetu sira.

Maibé, nia dehan, tenke tuir prosedimentu legál sira no karik rekruta funsionáriu obedese ba lei funsaun públika ne’ebé iha, no uza ema iha kualifikadu profisionál hodi apoiu prezidente autoridade foun hala’o ninia serbisu, atu atinje dezenvolvimentu ne’ebé hala’o iha Oé-Cussse.

Nia husu, labele halo de’it dezemvolvimentu iha de’it Oé-Cusse laran de’it maibé tenke halo dezenvolvimentu ba rejiaun Passabe, Pante Makasar, Nitibie no Oesilo, ati povu iha ne’eba sente dezenvolvimentu hosi orsamentu ne’ebé aloka ba Oé-Cusse iha ekilíbru justisa sosiál ba povu.

“Ha’u fiar Prezidente foun nia tenke haree no kaer nafatin ba memória instituisionál ne’ebé iha. Projetu ne’ebé lao nia halo kontinuasaun, aat buka hadi’a no buat ne’ebé seidauk iha buka atu halo foun. Nune’e, povu ida-ne’eba sente katak mais vale Oé-Cusse hanesan rejiaun espesiál ba dezenvolvimentu ne’ebé Governu sentrál fó ba sira,” nia sujere.

Nia hein katak Prezidente autoridade foun bele realiza kompromisu atu loké investigasaun internasionál ka auditória ba ró Haklosok ne’ebé durante ne’ebé sai preokupasaun públiku no ró ne’e nafatin seidauk mai Timor-Leste.

“Preokupasaun tenke fó ona verasidade faktu atu labele dun malu nafatin katak A ka B mak sala. Entaun, rekomenda nafatin ba Prezidente autoridade oinsá mak buka atu bele halo inspesaun ida ba Portugál, atu haree diretamente no mós husu auditória ida bele haree prezuiju ida ne’ebé Estadu no povu Oé-Cusse lakon ba ró Haksolok. Ho nune’e, bele hakotu ona kondenasaun hosi parte ida ba parte seluk,” nia hateten.

Kompeténsia Prezidente autoridade ne’e kompeténsia administrativa no polítika, maibé ba justisa ne’e iha kompeténsia Tribunál atu haree no espera ba oin bele hatene ró Haksolok serteza ona mai ka lae ou la mai.

Tanba ne’e, ezije Prezidente Autoridade RAEOA foun atu buka tuir hodi deklara ba públiku ró ne’e bainhira mak mai ou la mai.

“Hakarak Prezidente autoridade atu ba haree investimentu ida-ne’ebé ita iha Lisboa, kompañia ne’ebé ita atu halo estaleiru, ba hare took maizumenus envolvimentu timoroan hira, reseita hira mak fó ona mai Timor-Leste. Nune’e, povu ne’e bele sente ninia osan ne’ebé halo investimentu iha ne’eba ne’e iha duni benefísiu balun,” nia hateten.

Deputadu FRETILIN, Joaquim dos Santos, sei dúvida ho auditória ne’ebé atu halo ba ema-ne’ebé responsável ba ró Haksolok, se atu halo auditória ba administrasaun tomak hanoin bele halo auditoria no sé mak sala ne’e nia hatán tuir lei.

Notísia Relevante: PM Xanana husu Atoni-oan hamutuk ho Autoridade foun dezenvolve ekonomia sosiál iha Oé-Cusse

Jornalista : Nelson de Sousa

Editór        : Cancio Ximenes     

iklan
iklan

Leave a Reply

iklan
error: Content is protected !!