iklan

HEADLINE, MUNISÍPIU, OÉ-CUSSE (RAEOA), POLÍTIKA

PM Xanana husu Atoni-oan hamutuk ho Autoridade foun dezenvolve ekonomia sosiál iha Oé-Cusse

PM Xanana husu Atoni-oan hamutuk ho Autoridade foun dezenvolve ekonomia sosiál iha Oé-Cusse

Primeiru Ministru (PM), Kay Rala Xanana Gusmão no Prezidente Autoridade RAEOA fon, Rogério Lobato, iha otél Ambeno. Imajen mídia GPM.

OÉ-CUSSE, 31 janeiru 2024 (TATOLI) – Primeiru Ministru (PM), Kay Rala Xanana Gusmão, husu Atoni-oan sira iha Rejiaun Administrativa Espesiál Oé-Cusse Ambeno (RAEOA) atu servisu hamutuk autoridade foun hodi identifika  poténsia sira atu dezenvolve asuntu ekonomia sosiál iha rejiaun ne’e.

Notísia relevante: Xanana Gusmão fó pose Prezidente Autoridade RAEOA no Koordenadór ZEESM foun

Xefe Governu ne’e, hateten, IX Governu Konstitusionál nomea ona ekipa ZEESM no ohin pose ona, sei hamutuk ho povu Atoni, la’o haleu Oé-Cusse, hodi haree potensiál sira iha-ne’ebé de’it.

Tuir nia, ZEESM kuandu temi ekonomia sosiál, tenke dezenvolve ekonomia hosi nia hún hodi populasaun iha rai ne’e maka tenke simu benefísiu.

“Ekonomia sosiál ne’e nia sentidu maka ida-ne’e, maibé seidauk mosu liafuan ruma, ideia ruma kona-bá ida-ne’e, ne’e maka tau komisaun ida mai Oé-Cusse, hodi hamutuk ho imi, Rogério la’ós Oé-Cusse oan, só mai ko’alia ho imi, halibur imi, João Mendes Gonsalvés la’os Oé-Cusse oan, maibé ho ideia balu mai hamutuk ho imi la’o haleu hamutuk bele halo ida ekonomia sosiál ne’e,” Xanana Gusmão ko’alia iha serimónia pose ba estrutura RAEOA-ZEESM iha otél Ambeno, kuarta ne’e.

Xefe Governu apela, labele haree sira ohin simu pose ne’e buka problema fali ho sira, ne’e la’ós Oé-Cusse nia karáter, iha ideia ruma tau mós iha ne’ebá hadi’a.

“Ita tau sira iha-ne’e la’ós kargu permanente, la’e, ita tau sira iha-ne’ebá atu hadi’a, servisu la’ós ita sira toma pose ne’e, servisu sei barak, tanba ho imi-nia partisipasaun, imi-nia hakarak rasik, imi-nia vontade nu’udar Atoni-oan, ita sei hahú desentralizasaun iha-ne’e, Governu lokál komesa ona, Oé-Cusse nia oan sira,” nia apela.

“Ha’u fiar katak, iha Oé-Cusse imi ida de’it, hanoin ema rua to’o tolu, esforsa-aan ba, esforsa-aan bá, hasai buat fo’er hosi imi-nia ulun, tau buat loos, atu iha-ne’e, imi bele la’o, imi mesak, la’o ho di’ak dezenvolve Oé-Cusse, sei imi la’o ho di’ak, fó exemplu mós ba munisípiu 12 iha rai boot sira mós atu hala’o,” Xefe Governu enkoraja .

Notísia relevante: Povu Oe-Cusse espera estrutura RAEOA-ZEESM foun hakbesik dezenvolvimentu to’o baze

Jornalista: Abílio Elo Nini

Editór: Evaristo Soares Martins

iklan
iklan

Leave a Reply

iklan
error: Content is protected !!