Komisaun G iha PN enkoraja timoroan aplika bolsa rekrutamentu ba manorin
DILI, 01 fevereiru 2024 (TATOLI)—Vise Prezidente Komisaun G trata asuntu Edukasaun, Juventude, Desportu no Kultura iha Parlamentu Nasionál (PN), Deputadu Gabriel Soares, enkoraja profesór kontratadu no timoroan ne’ebé ramata ona sira-nia estudu atu aplika ba bolsa rekrutamentu ba manorin.
Notísia Relevante: Komisaun G bolu Ministra Edukasaun klarifika Estatutu Karreira Edukadór
“Ba manorin sira (kontratadu) ne’ebé ho paixaun kontribui ona sira-nia matenek no domin durante ne’e hanorin iha eskola sira, atu bele partisipa mós iha bolsa rekrutamentu ne’ebé agora daudaun ne’e Ministériu Edukasaun halo hela. Hanesan timoroan ita fó hanoin ba malu, dalan ida mak oinsá sidadaun ida iha nia vokasaun atu sai manorin mak dalan ida di’ak mak hanesan dadaun edukasaun halo rekrutamentu ne’e,” Vise Prezidente Komisaun G ne’e hateten ba jornalista sira iha uma fukun PN, kinta ne’e.
Nia enkoraja atu bele aplika bolsa rekrutamentu ba timoroan hotu ne’ebé mak iha vokasaun no inteRrese sai manorin iha eskola, entaun loke oportunidade ba hotu-hotu, nune’e ba manorin sira-ne’ebé daudaun sente sira-nia direitu hanesan prezudikadu karik mak di’ak-liu prontu ba kompete, no dalan ne’e nakloke ba sidadaun hotu-hotu.
Tanba ne’e, komisaun G konsidera polítika Ministériu Edukasaun loke vaga bolsa rekrutamentu ne’e mak dalan di’ak-liu liuhosi rekrutamentu.
Iha parte seluk, Vise Prezidente Komisaun G ne’e hateten komisaun seidauk simu informasaun ruma kona-ba kriteiru atu aplika vaga bolsa kandidadu ne’e presiza ho diploma baixarelatu, tan ne’e sei konfirma ho Ministériu Edukasaun.
Relasiona ho manorin kontratatu ne’ebé kontinua hala’o asaun pasífika ida-ne’e, konstituisaun RDTL fó dalan katak sidadaun hotu-hotu iha direitu atu espresa sira-nia hanoin tanba Estadu ne’e direitu demokrátiku maibé Estadu direitu demokrátiku iha nia regra.
Notísia Relevante: PN apresia ME rezolve profesór kontratadu 4000-resin ba permanente
Jornalista : Nelson de Sousa
Editór : Cancio Ximenes
