Xanana defende Fatuk Sinai inklui iha akordu Fronteira Terrestre
OÉ-CUSSE, 02 fevereiru 2024 (TATOLI) – Primeiru Ministru (PM) no Xefe Negosiadór Prinsipál ba Delimitasaun Definitiva Fronteira Marítima no Terrestre, Kay Rala Xanana Gusmão, defende fatuk Sinai tenke inklui iha akordu fronteira terrestre entre Timor-Leste no Indonézia nune’e parte rua bele hala’o atividade kulturál iha fatin refere.
Ne’e mak nu’udar razaun prinsipál Primeiru Ministru (PM), Kay Rala Xanana Gusmão, lakohi asina akordu fronteira Naktuka ho Prezidente Repúblika Indonézia, Jokowi iha Jakarta, tanba razaun rua. Ida mak Naktuka no Fatuk Sinai.
“Foin daudaun ha’u ba Jakarta atu asina, maibé ha’u tenke respeita imi-nia hanoin, imi-nia hakarak, katak, baliza bele iha, maibé imi-nia direitu ba eransa ne’e kontinua, ita defende maibé sira lakohi, tán ne’e maka ha’u la asina ne’e,” Xanana Gusmão, esplika ba komunidade sira, iha ámbitu diálogu, ne’ebe hala’o iha suku Bene-Ufe, kinta ne’e.
Notísia relevante: Abitante Naktuka fó fiar bá Xanana luta to’o finaliza fronteira terrestre
Xefe Governu dehan, atu asina fronteira terrestre, Estadu rua atu konsidera, komunidade rua, bele servisu iha sorin, sira-nian bele mai servisu iha ne’e, maibé fronteira nafatin.
Nune’e mós, komunidade rua persiza ba vizita Fatuk Sinai bele sunu-lilin iha-ne’ebá laiha problema, labele limita parte ida.
“Maibé rua ne’e hotu, sira la aseita no lakohi hakerek tán iha karta (akordu) ne’e, entaun ha’u lakohi asina,” Primeiru Ministru informa bá abitante sira iha Naktuka.
Xefe Governu fó ezemplu, bele iha ona liña fronteira, maibé komunidade sira iha sorin, sira-nia rai iha Timor-Leste, komunidade rua ne’e bele kontinua servisu sai no tama, fronteira nafatin fronteira.
“Tanba sira la simu no lakohi hakerek ne’e iha karta asina ne’e maka, ha’u lakohi asina, tanba ami koñese ona sira, kuandu asina tiha ona ho ema na’in-rua agora, iha futuru ema na’in-rua foun mai, sira dehan la hatene, ne’e mak ha’u haruka tenke hakerek, inklui Fatuk-Sinai ne’e.”
Nia hateten, tanba komunidade rua moris ho kultura hanesan, no família hela tanba iha liña froneira Naktuka ho Oépoli mesak lian Baiqueno.
“Imi-nia kultura ida de’it, hosi ne’e hola feto iha sorin, sira mós mai ita-nian, ita lori bibi ba oho iha-sira nia uma lulik, sira mós hanesan, entaun imi tenke kontinua ida-ne’e, atu asina tenke kosidera iha ida-ne’e, ha’u esplika ida-ne’e ba imi, fiar katak, ha’u la’ós fa’an rai,” nia katak.
Primeiru Ministru, husu komunidade Naktuka kontinua moris avontade, kalma, kria estabilidade iha liña fronteira, nune’e bele apoia negosiasaun la’o ho di’ak.
Notísia relevante: Fatuk Sinai La Inklui Territóriu Timor-Leste
Iha biban ne’e, Liberatu Punef, agradese tanba durante diálogu aberta ne’e, konsege ona solusaun, nune’e sira fó fiar Primeiru Ministru atu kontinua luta ba prosesu negosiasaun.
“Ohin esplikasaun ne’e klaru tebes, ami komprende ona, ami fó suporta ba Maun Boot atu kontinua prosesu ida-ne’e.”
Notísia relevante:Xanana seidauk foti desizaun kona-ba Naktuka
Jornalista: Abílio Elo Nini
Editór: Evaristo Soares Martins
