OÉ-CUSSE, 07 fevereiru 2024 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Rogério Tiago Lobato, sei husu opiniaun ba Igreja Katólika Timor-Leste, liuhosi Dom Virgílio do Carmo da Silva, SBD, atu observa kona-bá fatin turizmu kulturál Nunuheno.
Fatin turizmu kulturál Nunuhenu, lokaliza iha aldeia Noeninen, suku Cunha, sub-rejiaun Pante Makasar, koñesidu nu’udar fatin istóriku, tanba bainbain halibur komunidade, joven sira hosi lokál, nasionál no internasionál inklui partidu polítiku uza fatin ne’e hodi sunu lilin husu matak malirin.
Notísia relevante: Autoridade RAEOA sei transforma Nunuhenu sai fatin istóriku
Fatin ne’e mós hanesan prezensa Igreja Katólika mai Timor-Leste liuhosi odamatan Lifau, no misionáriu sira fó sarani batizmu relijiaun Kátólika dahuluk iha fatin Nunuheno, dezde bei-ala sira hosi jerasaun ba jerasaun, sempre halo serimónia kulturál.
Nune’e iha mandatu autoridade sesante deside hadi’a fatin ne’e, hodi konstrui infraestrutura sira hanesan, kapela, moru, postu seguransa inklui fasilidade sanitária, maibé laiha koñesimentu ba Igereja Katólika.
“Sira halo uma kreda ne’e, la husu opiniaun ba padre pároku, tuir loloos sira tenke halo tuir dalan ida-ne’ebé legál, katak sira tenke rekoñese pároku ne’e, ohin ha’u mai iha-ne’e atu haree, primeiru ha’u rekoñese padre hanesan hanesan pertense ba igereja foun ne’e ba pároku Padiae, lakleur tán Amu Cardeál sei mai to’o ne’e, ha’u ko’alia ona ho nia, no prontu atu mai iha-ne’e atu hadi’a buat sira-ne’e tuir dalan ne’ebé di’ak,” Rogério Lobato, ba jornalista sira hafoin hala’o vizita, kuarta ne’e .
Notísia relevante:Fatin simu sakramentu batizmu dahuluk iha RAEOA, transforma ba turizmu kulturál
Iha fatin hanesan, Padre Pároku Padia’e, Carlos De Deus, informa, kapela foun ne’ebé iha fatin turizmu kulturál Nunuheno, seidauk bele kompleta, presiza koordena ho Igereja Katólika atu hadi’a.
“To’o agora ha’u sedauk rekoñese kapela foun ne’e pertense ba parokia Padia’e, ne’ebé ho prezensa Prezidente Autoridade RAEOA, ha’u nu’udar pároku iha-ne’e, ha’u tenke hato’o, bainhira atu entrega karik hatene nia prosesu ne’e oinsá, tanba iha kapela laran ne’e, halo hanesan aula, laiha altar lulik, tán ne’e bainhira konstrui obra relijioza nian, presiza koordena ho parte igereja nune’e bele apoia ideia,” nia katak.
Entretantu, antes ne’e Diretór Rejionál Infraestrutura, Candido dos Reis Amarál, informa, konstrusaun fatin turizmu kulturál ne’e, nia progresu atinje ona 80, sei presiza kompleta ho moru protesaun.
Projetu ne’e ezekuta hosi kompañia Grand Enclave Unipesoál, Lda, ho valór kontratu $440,843.10, Autoridade RAEOA aloka hosi Orsamentu Jerál Estadu (OJE) 2021 nian.
Notísia relevante: Projetu turizmu kulturál Nunuhenu atraza tanba disputa rai
Jornalista: Abílio Elo Nini
Editór: Evaristo Soares Martins
