OÉ-CUSSE, 28 setembru 2021 (TATOLI)—Prezidente Autoridade RAEOA, Arsénio Paixão Bano, hateten molok atu transforma Nunuhenu sai fatin istóriku ba komunidade suku 18 iha Oé-Cusse, Dirasaun Rejionál Infraestrutura (DRI) liuhosi unidade Institutu Jestaun Ekipamentu (IJE) hahú halo preparasaun hodi ateru rai.
“Iha tinan ne’e, autoridade RAEOA sei hadi’a fatin Nunuhenu, atu proteje investimentu fatin sagradu no fatin istóriku nian. Ita sei halo uluk kapela ida no harii lutu haleu fatin ne’e. Tanba ne’e, ohin, autoridade hahú inisiativa ne’e liuhosi servisu Dirasaun Obra Públika orienta unidade IJE hahú prepara kondisaun,” Arsénio Paixão Bano informa ba Agência Tatoli iha Nunuheno, suku Cunha, sub-rejiaun Pante Makasar, tersa ne’e.
Planu atu hahú konstrusaun, autoridade sei halo prosesu konkursu iha fulan outubru tinan ne’e. Iha fatin ne’e, primeiru sei harii uluk kapela ida, depois kontinua halo lutu haleu fatin ne’e.
Ba futuru, nia dehan, sei halo land-scaping no halo hanesan fatin turizmu hodi halibur ema barak no espesiál liu mak prepara fatin ba komunidade baibain realiza serimonia kulturál iha fatin ne’e.
“Autoridade hakarak halo ida-ne’e tanba Nunuheno fatin ba suku 18, maluk balun hosi rai boot mai sunu lilin iha fatin ne’e, balun hosi Kefa, Kupang mós mai halo serimonia kultura iha ne’e. Tanba ne’e mak iha tinan ne’e, autoridade hakarak halo fatin ne’e sai fatin istóriku di’ak liután,” nia dehan.
Daudaun ne’e, IJE hahú prepara kontrolu seias no prepara kondisaun atu proteje área ne’e antes udan monu rai no segundu mak ba faze konstrusaun nian. Tanba ne’e, IJE bele normaliza ona, nune’e mota labele estraga-tan komunidade sira-nia produtu.
Liu-liu, nia dehan, atu proteje investimentu agrikultura nian ba barajen Mota Tono, nune’e labele hetan estragu tanba inundasaun iha 4 abríl ne’e, bee mota estraga komunidade nia natar, to’os, no uma no estraga mós fatin istoriku Nunuhenu inklui rate sira estraga hotu.
Xefe Suku Cunha, Domingos Seco Caunan, hateten hanesan autridade sei apoiu programa ne’ebé autoridade RAEOA planea tanba importante mak halo ba povu Óé-Cusse nia di’ak.
“Ha’u sente kontente tanba autoridade hahú inísia atu konstrui obra istóriku iha fatin Nunuhenu. Tanba, fatin ne’e halibúr ema barak dezde tempu uluk to’o agora, tantu hosi rai boot no rai seluk. Tanba fatin ne’e konsentra ema barak mai hosi suku 18,” nia dehan.
Jornalista : Abílio Elo Nini
Editór : Cancio Ximenes
