DILI, 08 fevereiru 2024 (TATOLI)-Deputadu FRETILIN, Joaquim dos Santos ‘Boraluli’, hateten tempu ona Parlamentu Nasionál (PN) iha lejislatura daneen altera kódigu sivíl hodi fó rekoñesimentu kazamentu ba relijiaun seluk.
Notísia Relevante: JSMP fó paresér PN altera kódigu sivíl rekoñesimentu kazamentu ba relijiaun seluk
Presiza tratamentu hanesan iha lei nia oin, bazea ba konstituisaun RDTL artigu 16 kona-ba universalidade de direitu sidadaun hotu iha lei nia oin, nune’e mós artigu 45 liberdade konfisaun relijiozu, tanba ne’e mak to’o agora Parlamentu Nasionál seidauk iha lejislasaun espesífiku.
“Ha’u hanoin, tempu ona para Parlamentár sira foti inisiativa para garante boa relasaun entre sidadaun sira iha diferensa konfesaun relijaun. Nune’e mós garante Governu ninia asisténsia ba sidadaun sira-ne’ebé iha diferensa relijiaun liuliu iha prosedimentu atu hetan sira-nia direitu presiza regula,” Nia hateten hosi responde Agência Tatoli iha uma fukun PN, kinta ne’e.
Atuál Deputadu hosi membru komisaun A trata asuntu Justisa no Konstituisionál ne’e hateten, agora TL iha lei vijente maibé asuntu balun presiza hadi’a, tanba ne’e bankada FRETILIN hanoin ona atu prepara projetu alterasaun lei hodi aprezenta.
“Ami-nia bankada agora sei prepara hela ezbosu ne’e, halo hela peskiza. Se tempu badak prontu ona, sei aprezenta ba Parlamentu kona-ba konfisaun relijiozu liuliu liga ba direitu kazamentu ho ninia efeitu,” nia hateten.
Tanba, nia hateten, iha TL neé maiória fé kristaun, tuir mai Budha, Hindu, Islámiku, entaun iha sosiedade ida moris iha plularidade ho valór relijiozu ne’e, konsidera hanesan rikeza Estadu ninian maibé presiza regula sira-ninia interasaun sosiál, nune’e mós regula responsabilidade autoridade Governante sira-nian hodi bele garante ezersísiu direitu sidadaun nian.
“Ne’ebé kle’ur ona, ita hanoin no iha lejislatura dalimak halo ona peskiza no halo ezbosu depois haree sei falta buat ruma. Agora, haree fali re-apresiasaun bainhira prontu ona sei aprezenta ba Parlamentu Nasionál, no iha komisaun A mós diskute uitoan ona atu haree aprezenta projetu alterasaun refere,” nia dehan.
Notísia Relevante: Komunidade Musulmanu labele hetan sertidaun kazamentu tanba lei la fó dalan
Jornalista : Nelson de Sousa
Editór : Cancio Ximenes
