iklan

EKONOMIA, BOBONARO, HEADLINE, MUNISÍPIU

PNDS Bobonaro koloka ona pesoál tékniku monitoriza projetu UNP

PNDS Bobonaro koloka ona pesoál tékniku monitoriza projetu UNP

Kondisaun atuál projetu Uma Naroman ba Povu (UNP) faze daruak tinan 2022 iha suku Oeleu, postu administrativu Bobonaro, munisípiu Bobonaro. Imajen Tatoli/Sérgio da Cruz.

BOBONARO, 09 fevereiru 2024 (TATOLI) – Programa Nasionál Dezenvolvimentu Suku (PNDS) munisípiu Bobonaro lideradu Rosário Mali, koloka ona pesoál tékniku hodi halo monitorizasaun bá implementasaun projetu Uma Naroman bá Povu (UNP).

“Iha fulan hirak liubá ita iha halo rekrutamentu funsionáriu kazuál foun sira, agora daudaun koloka ona ba postu neen, maibé sira foun, seidauk domina matadalan no seidauk hetan formasaun, iha de’it on the joob treaning tún ba terrenu mak aprende, agora daudaun sira ba ona terrenu no projetu balu atraza tanba tempu udan, liuliu postu Cailaco, Bobonaro no Lolotoe, ita atu ba de’it sede suku araska, sá tán ba aldeia,” nia ko’alia iha Maliana, sesta ne’e.

Nia haktuir, suku balun badaen ida kaer uma rua, nia book ida, depois ida fali paradu, no dalaruma Timor ne’e kultura ne’e mak maka’as, funsionáriu sira ba monitoriza badaen laiha, sira husu ba dehan badaen ne’e sei ba halo lia, bele to’o semana ida, ne’e mak problema.

Rosario Mali informa, daudaun ne’e ekipa tekiku PNDS kontinua halo esforsu oinoin hamutuk ho fronesedór sira oinsá loron ida ka rua udan para bele mobiliza materiál ba fatin projetu sira-ne’ebé durante ne’e paradu.

“Iha suku balu materiál ne’ebé atu utiliza ne’e ami fó hotu kedas ba, maibé sumente labele tanba rai malirin simentu fatuk estraga hotu,” Responsável PNDS Bobonaro ne’e hateten.

Diretór PNDS Munisípiu Bobonaro ne’e koa’lia asuntu ne’e hodi responde hosi benefisiária no xefe suku, kona-bá konstrusaun Uma Naroman ba Povu (UNP) faze daruak tinan 2022 hamutuk unidade sia iha suku Oe-Leu, postu administrativu Bobonaro, daudaun ne’e servisu fíziku paradu.

Benefisiária UNP suku Oeleu, Agrefina Vicente, hateten obras refere paradu dezde fulan-agostu 2023 no to’o agora laiha tékniku Programa Nasionál Dezembolvimentu Suku (PNDS) ida mai halo monitorizasaun.

Agrefina Viçente nu’udar benefisiária bá Uma Naroman ba Povu (UNP) tinan 2022 iha suku Oeleu, postu administrativu Bobonaro, munisípiu Bobonaro, hamriik hela uma-dapur ne’ebé sira helik ba durante konstrusaun la’o. Imajen Tatoli/Sérgio da Cruz.

Benfesiária ne’e argumenta, daudaun ne’e tempu udan ho anin sente ladún di’ak, tanba  hafoin sobu uma tuan, sira hela de’it iha dapur ne’ebé ho kondisaun la dignu.

Notísia relevante: Progresu fíziku UNP 2022 iha Bobonaro atinje ona 86%

“Uma ne’e kalen mós seidauk taka hanesan ne’e de’it ka, ami agora hela iha dapur ne’ebá ne’e, agora dapur ne’e mos aat hotu ona, agora sira la mai haree tinan ida ho balun ona, badaen sira mós la mai halo, sasán laiha ne’e, kasian haruka governu halo lalais ona, ha’u-nia uma mós ladi’ak ona,” nia informa ba Jornalista sira iha Oe-Leu.

Tuir observasaun Jornalista Ajénsia Tatoli iha terrenu, nota katak parede uma hirak-ne’e balu bee-teen kaer hotu ona no kosen ba janela ho odamatan balun mós amaeadu atu dodok kauza hodi udan-been.

Xefes uku Oe-Leu, postu administrativu Bobonaro, Januário Meta-Tae Bragança, reforsa tuir loloos projetu refere finaliza iha 2023 nia rohan, maibé la konsege tanba kestaun tékniku.

Nia parte ho ekipa jestaun suku halo ona reuniaun ho dirijente PNDS munisípiu Bobonaro inklui fornesedór hodi solusiona problema refere.

“Ninia problema ne’e tékniku ho fornesedór, maibé agora daudaun fornesedór aseita ona, loos ona, sira mós atu hatama ona relatóriu, ita espera iha tempu badak bele la’o fali ona,” Xefe suku Januário hateten.

Enkuantu obra ne’e atinje ona 75% ne’ebé daudaun iha ona faze atu atu taka kalen uma kakuluk no dapur, enkunatu reboka hotu ona no uma hirak-ne’e unidade tolu implementa iha aldeia Oe-Leu Taz, neen iha aldeia Mologen.

Diretór PNDS Munisípiu Bobonaro, Rosário Mali, fundamenta projetu refere la’o atrazu tanba kestaun menus rekursu umanu no situasaun klima hodi difikulta fornesedór mobiliza materiál lokál no fabrikadu ba terrenu.

Tuir dadus tinan 2022 munisípiu Bobonario hetan projetu UNP hamutuk 459 ne’ebé daudaun ne’e ninia progresu fíziku atinje ona 99%.

Notísia relevante: Autoridade Bobonaro sei forma ekipa fiskaliza projetu PNDS la’o atraza

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!