DILI, 12 fevereiru 2024 (TATOLI)—Komisaun Nasionál Eleisaun (CNE, sigla portugés), segunda ne’e, ofisialmente delega ona ekipa hosi Timor-Leste hodi sai observadór iha eleisaun jerál Indonézia 2024, ne’ebé sei realiza iha loron 14 fevereiru.
Prezidente CNE, osé Agostinho da Costa Beloo, hateten, Timor-Leste nia tanba hetan konvite hosi Komisaun Eleisaun Jerál (KPU, sigla indonézia) Repúblika Indonézia liuhosi programa Indonesia’s Election Visit.
“Ita hetan kovite, ohin ita-nia komisáriu na’in-rua akompaña ho tékniku ida bá ona Indonézia tanba kooperasaun ne’ebé iha Timor-Leste nia prezensa importante iha eleisaun ne’e,” Prezidente CNE, informa iha salaun laline-Lariguto CNE, Caicoli, segunda ne’e.
Notísia relevante : CNE tinan ne’e hakarak estabelese sistema biométriku
Durante delegasaun nia prezensa iha ne’ebá, sira sei hamutuk ho ekipa hosi nasaun sira seluk hodi vizita no halo observasaun ba fatin preparasaun ba votasaun sira hodi sai referénsia ba Timor-Leste.
“Sira la’ós haree de’it ba eleisaun maibé sei vizita fatin preparasaun ba eleisaun ne’e la’o hanusa nune’e bainhira fila mai esperénsia ne’ebé iha bele hadi’a di’ak liután CNE ba iha eleisaun jerál sira atu nune’e Timor-Leste kiik maibé bele sai ezmplu di’ak ba nasaun sira seluk,” nia akresenta.
Timor-Leste rasik antes ne’e sai ona observadór iha eleisaun jerál Indonézia iha tinan 2019.
Kandidatu Prezidente Repúblika Indonézia ba períodu 2024-2029 mak hanesan, Anies Baswedan ho nia Vise Muhaimin Iskandar, Prabowo Subianto ho nia Vise Gibran Rakabuming Raka no Ganjar Pranowo ho nia Vise Mahfudz MD.
Jornalista : Arminda Fonseca
Editora : Julia Chatarina
