iklan

NASIONÁL, EKONOMIA, HEADLINE

Kustu ba projetu konstrusaun biblioteka nasionál sa’e tanba inflasaun

Kustu ba projetu konstrusaun biblioteka nasionál sa’e tanba inflasaun

Prezidente Autoridade Nasionál Petróleu, Gualdino do Carmo da Silva. Imajen Tatoli/António Daciparu

DILI, 13 fevereiru 2024 (TATOLI)—Governu iha ona desizaun atu loke konkursu foun ba projetu konstrusaun biblioteka iha tinan ne’e nia laran tanba iha mudansa ba ninia kustu.

“Tanba prosesu ne’e tinan barak ona entaun sofre ona inflasaun, katak ninia valór antes millaun $10 bele halo uma ho valór refere maibé ho inflasaun tinan barak nia laran to’o agora ne’e millaun $10 ne’e labele ona halo obra ne’ebé ita hakarak halo iha tinan 12 liubá, entaun tenke aumenta kustu badaen, dezeñu no konstrusaun ba biblioteka ne’e,” Prezidente Autoridade Nasionál Petróleu, Institutu Públiku (ANP, I.P), Gualdino do Carmo da Silva, hateten hafoin halo abertura ba sorumutuk ne’ebé realiza hosi ANP no Autoridade Aduaneira, iha Delta Nova, tersa ne’e.

Notísia relevante : ANP iha tinan oin sei loke hikas konkursu ba konstrusaun biblioteka nasionál

Kustu adisionál sei mai hosi Estadu liuhosi Sekretaria Estadu Arte no Kultura (SEAK) ninia apoia tomak.

“Progresu daudaun ami iha hela diskusaun ho Governu, liu-liu internalmente ho entidade relavante nune’e atu avansa ba konkursu karik tuir protokolu no regra ne’ebé vigora iha ita-nia rain. Kona-ba kustu sei iha diskusaun nia laran, ne’ebé tempu badak sei fó sai,” nia akresenta.

Orsamentu ne’ebé prevee ba konstrusaun biblioteka nasionál hamutuk millaun $10, ne’ebé disponibiliza hosi empreza Eni ba Governu iha tinan 2009 bainhira sira sei halo hela perfurasaun mina iha kampu petrolífera Kitan, maibé daudaun la halo ona atividade nune’e ezekutivu tenke tiha osan ne’e hodi harii biblioteka nasionál. Governu disponibiliza ona orsamentu adisionál millaun $2,3 ba faze dahuluk konstrusaun, diresionadu ba edifikasaun morru no supervizaun ba konstrusaun edifísiu.

Konkursu ne’ebé loke ona antes ne’e empreza internasionál Sanghai Construction mak sai manán-na’in, maibé tanba hasoru difikuldade, nune’e empreza deside rezigna-an.

Bioblioteka nasionál sei harii iha área Hudi-laran, postu administrativu Dom Aleixo, munisípiu Dili, ho medida rai 27.000 m3, ne’ebé antes ne’e halo ona lansamentu fatuk dahuluk iha loron 16 agostu 2017 no halo serimónia hanesan iha loron 22 jullu 2022.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!