DILI, 15 fevereiru (TATOLI)–Diretór Servisu Saúde Munisípiu Díli, Mateus Pinto, hateten atu kombate moras dengue, Servisu Saúde Dili ho voluntáriu Cruz Vermelha Timor-Leste (CVTL) halo fomigasaun ba uma kain 4.917 hosi totál uma kain hamutuk 5.779 iha kapitál Dili.
Notísia Relevante: Prevene dengue, ekipa saúde munisípiu Dili kontinua halo fumigasaun iha área risku
Totál uma kain ne’ebé la hetan fumigasaun ne’e hamutuk 882, tanba de’it ho razaun moras nfesaun vias Respiratóriu Aguda (IRA) iha uma laran no balun fó razaun uma-na’in ba tiha ona foho no seluk fali ne’e tanba uma-na’in lakohi simu ekipa fomigasaun.
Atividade fomigasaun ne’e hala’o ba populasaun nia hela fatin iha postu administrativu Dom Aleixo, Vera Cruz, Cristo Rei, Na’in Feto no postu administrative lahalo fomigasaun tanba iha fatin ne’e la rejista kazu dengue.
“Ita hahu fhalo omigasaun massál iha loron 01 novembru 2023 to’o mai 16 janeiru 2024. Signifika iha komunidade barak mak iha ona konsiénsia hakarak fumiga ka rega sira-nia uma atu hamate susuk hodi labele afeta ba moras dengue,” Diretór servisu saúde Dili ne’e hateten ba Agência Tatoli iha nia kna’ar fatin, sentru saúde Formosa, kinta ne’e.
Nia garante katak ho atividade fomigasaun ne’ebele redús kazu dengue, tanba normalmente iha primeiru trimestral liuliu iha fulan janeiru to’o marsu ne’e, servisu saúde Dili rejista kazu dengue barak tebes.
Atu prevene, nia apela, komunidade ida-idak atu kuidadu soe lixu iha nia fatin, halo limpeza nafatin, fase tanke bee nianno labele rai roda uzadu iha uma tanba roda aat sira-ne’e nia laran bainhira bee nalihun ne’e, sei hakiak susuk nia tolun.
Atu kombate moras dengue ne’e, nia dehan, Servisu Saúde Dili mós distribui abate 11.797 ba uma kain hamutuk 5.735 iha Dili.
“Abate ne’e atu kombate susuk nia tolun iha bee iha tanke laran. Entaun, ekipa komesa distribui iha fulan-setembru 2023 no agora kontinua la’o. Tanba, prazu ba abate nia funsionamentu ne’e to’o fulan tolu de’it,” nia hateten.
Hosi janeiru to’o semana daruak fulan fevereiru nian ne’e, servisu saúde Dili rejista kazu dengue hamuttk 84 iha Dili, ne’ebé kompostu hosi postu administrativu Dom Aleixo hamutuk 39, Vera Cruz 21, Cristo Rei 13, Na’in Feto hamutuk 11 no postu administrativu Metinaro ne’e laiha (zero).
Jornalista : Jesuína Xavier
Editór : Cancio Ximenes
