iklan

HEADLINE, SAÚDE

Prevene dengue, ekipa saúde munisípiu Dili kontinua halo fumigasaun iha área risku

Prevene dengue, ekipa saúde munisípiu Dili kontinua halo fumigasaun iha área risku

Ekipa CVTL halo fomigasaun ba atuasaun kazu dengue iha bairo Becusi Sentral, loron kinta (20/01). Imajen Tatoli/Francisco Sony

DILI, 28 juñu 2022 (TATOLI)— Xefe Departamentu Tékniku Programatiku Servisu Saúde Munisípiu Dili, Anacleto Aparicio Guterres, informa daudaun ne’e kontinua halo atividade fumigasaun iha área risku sira iha postu administrativu lima iha munisípiu Dili hodi prevene moras dengue.

“Durante ne’e, ita halo fumigasaun bazeia ba kazu ne’ebé mak iha entaun ita-nia atividade ida ne’e hahú iha janeiru mai too agora kontinua la’o tanba fumigasaun no abate sufisiente hela,” Xefe Departamentu ne’e hateten ba Agência TATOLI, iha knar fatin-Dili, tersa ne’e.

Iha fatin ketak, Diretór Nasionál Saúde Publika, Frederico Bosco, hateten ekipa saúde nafatin alerta ba komunidade sira atu halo prevensaun ba moras dengue liuhosi halo limpeza iha ida-idak nia uma.

“Ita-nia vizilánsia sira iha sentru saúde no munisípiu sira nafatin la’o hodi aviza ba komunidade sira atu halo prevensaun ba moras dengue, tanba tempu ida agora udan monu rai halo bee nalihun hodi hamosu moras sira ne’e,” Diretór Nasionál ne’e sujere.

Nia dehan, Kazu sira ne’ebé mak loro-loron iha depende ba situasaun, hafoin periodu surtu nian hanesan hahú iha fulan janeiru mai too abríl   kazu dengue nia númeru sa’e maka’as.

“Iha janeiru mai abríl ne’e kada loron bele deteta kazu 60 ba leten, maibé agora menus tanba dala ruma loron ida ita deteta na’in-hitu, maibé halo tratamentu de’it fasilidade saúde,” nia afirma.

Tuir dadus hosi Diresaun Nasionál Saúde Públika liuliu Departamentu Vijilansia Epidemolojia iha Ministériu Saúde, hahú fulan-janeiru too horiseik  pasiente dengue sa’e ba 5.264 no óbitu na’in-57.

Maioria kazu ne’e deteta husi Munisípiu Dili ho totál 3.671 Baucau 331, Manatuto 176, Covalima 149, Ermera ho kazu 118, Manufahi 213, Viqueque 83, Ainaro 45, Liquiça 164, Aileu 85 no Bobonaro 58, Lautem 165, no RAEOA neen.

Notísia relevante:Surtu dengue: pasiente sa’e ba 5.264 no óbitu na’in-57

Jornalista : Felicidade Ximenes

Editór        : Florencio Miranda Ximenes

iklan
iklan

Leave a Reply

iklan
error: Content is protected !!