DILI, 17 fevereiru 2024 (TATOLI)—Membru Assosição dos Ex-Prizioneiros Políticos de Timor-Leste (ASSEPPOL-TL) konvoka konferénsia nível munisipál hodi diskute asuntu tolu hodi bele implementa iha tinan, nune’e bele dignifika prizioneiru polítiku sira.
“Antes ne’e ita hahú ona iha munisípiu sira, ikus mai ita ohin hala’o iha Dili. Objetivu prinsipál hosi konferénsia ne’e mak atu diskute estatutu asosiasaun, define planu estratéjiku inklui planu asaun anuál ne’ebé sei lori ba konferénsia nasionál ne’ebé ita sei hala’o iha tinan ne’e,” Prezidente ASSEPPOL-TL, Jacinto Alves informa ba Agência Tatoli hafoin abertura konferénsia ne’ebé hala’o iha munisípiu Dili, sábadu ne’e.
Konferénsia munisipál nu’udar meiu ida hodi konsolida malu hodi bele dignifika membru ASSEPPOL-TL sira, liu-liu ba hirak ne’ebé uluk sai hanesan prizioneiru polítiku iha okupasaun militár Indonézia, nune’e ba oin bele kontribui ba dezenvimentu nasionál.
Notísia relevante : ASSEPPOL diskute implementasaun programa no oinsá atu dignifika eis-prizoneiru polítiku sira
Tanba ne’e, asosiasaun hahú organiza fali an hodi konsolida fali membru sira hodi rekolla istória no memória atu fó esplikasaun klaru ba povu ne’ebé uluk liuhosi terus naruk, maski povu ki’ik ho limitasaun maibé konsege atinje luta ba ukun-an.
“Ami-nia misaun ne’e mak dignifika prizioneiru polítiku sira liuhosi promosaun valór no habelar istória ne’ebé luta, kombate ba ita-nian sosiadade hodi sira bele iha nafatin sensibilidade ba progresu polítiku ne’ebé iha ita-nia rai laran,” nia tenik.
Aleinde ne’e, ASSEPPOL-TL hakarak sosiedade Timor-Leste tenke iha sensibilidade, tanba ne’e asosiasaun kontinua nafatin halo advokasia ba prizioneiru polítiku sira.
ASSEPPOL-TL harii iha loron 17 fevereiru 2000, hafoin eziste hanesan asosiasun hetan fiar iha momentu ne’e hodi sai hanesan standing committee iha Komisaun Amizade Verdade Rekonsilasaun (CAVR), nune’e hakotu siklu ódiu no vigansa tanba funu naruk.
“Daudaun ami-nia membru prizioneiru polítiku rejistradu foin iha 500, bainhira ami halo tiha konferénsia nasionál, ami kontinua buka tuir mai membru sira hodi bele hamutuk kontribui liután ba prosesu dezenvolvimentu nasionál,” Prezidente asosiasaun dehan.
Jornalista : Natalino Costa
Editora : Julia Chatarina
