DILI, 19 fevereiru 2024 (TATOLI)—Portavóz Gabinete Ministériu Edukasaun (ME), Filipe Rodrigues Pereira, hateten profesór kontratadu tinan 2023 nian hamutuk 1.499 la tama ingresu espesiál tanba la prienxe kritériu.
Notísia Relevante: Profesór kontratadu 4.019 sei tama iha ingresu espesiál
“Profesór kontratadu tinan 2023 hirak ne’e, sira laiha última avaliasaun dezempeñu ba tinan 2021 ho 2022 nian, ne’ebé rejistadu iha SIGAP (Sistema Integradu Gestão Administrasaun Públika) iha Komisaun Funsaun Públika (KFP).” Portavós ne’e hateten ba jornalista sira iha konferénsia imprensa iha salaun Ministériu Edukasaun, Vila Verde, segunda ne’e.
Prosesu ingresu espesiál ba profesór kontratadu sira-ne’e, nia dehan, ME foti desizaun bazea ba despaixu hosi KFP iha 14 novembru 2023, ho númeru 12433/2023/CFP ne’ebé asina hosi Prezidente KFP sesante Faustino Cardoso Gomes.
Iha despaixu refere ‘determina’ katak profesór kontratadu sira tenke aprezenta última avaliasaun dezempeñu hosi tinan 2021 ho 2022 nian, nu’udar mós kritériu ida atu tama ba ingresu espesiál.
“Ami afirma dala ida tan katak ingresu espesiál ne’ebé ME halo ona iha dezembru 2023 bazea Dekretu-Lei nú. 31/2023, 31 maiu, ne’ebé VIII Governu Konstitusionál aprova no reforsa hosi despaixu Prezidente Komisaun Funsaun Públika, Faustino Cardoso Gomes iha 14 novembru 2023,” nia hateten.
Husi aspetu umanu no sosiál, portavós ne’e hateten, Ministériu Edukasaun komprende tebe-tebes sentimentu, preokupasaun no opiniaun sira hosi parte hotu ligadu ho ingresu espesiál ba profesór kontratradu sira maibé Ministériu Edukasaun mós hakarak husu ba parte hotu, labele obriga Ministériu Edukasaun atu viola lei ka regra sira iha rai doben Timor-Leste.
Ho kestaun sira-ne’e, Ministériu Edukasaun husu mós atu eis-dirijente Ministériu Edukasaun Juventude no Desportu (MEJD) nian, hosi VIII Governu atu bele esplika ho di’ak no loloos kona-ba polítika politika VIII Governu nian ne’ebé hatuur iha Dekretu-Lei Nú. 31/2023, kona-ba Estatutu Kareira Dosente liuliu liga ho artigu 11 kona-ba lala’ok tomak ingresu espesiál ba profesór kontratadu 2023 sira.
“Tanbasá mak Dekretu-Lei 31/2023, 31 maiu, la akomoda profesór kontratadu 2023 nia direitu no ezijénsia ba ingresu espesiál. Iha dekretu-lei ne’e mós la dehan atu parte rua notifika malu bainhira kontratu termina.” nia esplika.
Tanba ne’e, Ministeriu Edukasaun hakarak klarifika katak implementasaun ingresu espesiál nu’udar polítika VIII Governu nian, ne’ebé hatu’ur iha Dekretu-Lei Nú. 31/2023, 31 maiu.
Iha dezembru tinan 2023, Ministeriu Edukasaun halo ona ingresu espesiál ba profesór kontratadu 4.600-resin tanba prienxe kritériu tuir artigu 11, Dekretu-Lei 31/2023.
Jornalista : Osória Marques
Editór : Cancio Ximenes
