Rogério Lobato sei fasilita komunidade Ambeno asesu kréditu
OÉ-CUSSE, 20 fevereiru 2024 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Rogério Tiago Lobato, sei fasilita komunidade asesu kréditu iha rejiaun ne’e.
Notísia relevante: Rogério Lobato prioriza bee-moos nu’udar ajenda prinsipál iha RAEOA
Prezidente Autoridade RAEOA, Rogério Tiago Lobato, ko’alia asuntu ne’e bainhira hala’o abertura kona-bá semináriu nasionál ne’ebé realiza hosi Universidade da Paz (UNPAZ) iha otél Ambeno Oé-Cusse, tersa ne’e.
Eis Ministru Interiór ne’e, informa, durante ne’e ema hotu hakarak servisu, Estadu nu’udar empregadór prinsipál tanba setór privadu sei fraku.
“Ha’u iha-ne’e, tenke fó títulu propriedade ba ema idak-idak iha Oé-Cusse sai hanesan garantia ida ba sira, no atu sai mós ezemplu ba munisipíu seluk,” Rogério Tiago Lobato, ko’alia iha otél Ambeno, tersa ne’e.
Nune’e, nia dehan, iha tempu badak sei orienta Sekretáriu Rejionál ba Asuntu Agrikultura, atu identifika propriedade sira-ne’ebé hetan ona kompensasaun no sira-ne’ebé seidauk hetan, nune’e bele fasailita.
“Tanba kuandu ita iha títulu propriedade, imi bele kaer títulu ne’e, rekoñesidu hosi Sekretáriu Rejionál Asuntu Terra Propriedade, sai hanesan dokumentu ida, imi bele aprezenta iha banku sai hanesan jaminan,” nia afirma.
Rogério Lobato, rekoñese funsionáriu públiku balun, direitu saláriu la sufisiente, atu sustenta família no uma laran, nune’e presiza atividade seluk atubele apoia.
“Ita servisu ona iha Estadu, maibé ita-nia saláriu la sufisiente, dalaruma, ita ba husu iha banku, maibé fo kréditu uitoan de’it, maibé saláriu aumenta ho títulu rai, ita sei hetan osan barak, no bele muda moris liuhosi fila liman,” nia katak.
Notísia relevante: Rogério Lobato nomea Amaro Efi lidera Agrikultura Oé-Cusse
Jornalista: Abílio Elo Nini
Editór: Evaristo Soares Martins
