iklan

NASIONÁL, EDUKASAUN, HEADLINE

NGO Belun klarifika prosesu rekrutamentu bolsa kandidatu profesór

NGO Belun klarifika prosesu rekrutamentu bolsa kandidatu profesór

Servisu Edukasaun munisípiu Viqueque no ONG Belun hahú simu dokomentu kandidatu profesór. Imajén Tatoli/Vitorino Lopes da Costa

DILI, 23 fevereiru 2024 (TATOLI)-Koordenadór programa bolsu kandidatu profesór hosi Organizasaun Belun, Miguel Soares, klarifika katak prosesu rekrutamentu ba bolsu kandidatu profesór sira ne’ebé maka Ministériu Edukasaun hala’o iha tinan ne’e ne’e la’o ho transparánsia.

“Ha’u hanoin ninia prosesu ne’e transparánsia ba ema hotu tanba primeiru bolsu kandidatu profesór loke ba públiku tanba akompañia no halo verifikasaun hosi NGO Belun ba dadus bolsu Kandidatu ne’e. Tuir ami-nia haree ba rezultadu bolsu kuaze 8.000-resin,” nia hateten ba TATOLI, iha ninia servisu fatin Faról, Dili, sesta ne’e.

Notísia Relevante :Aplikante 8.601 konkorre bolsa rekrutamentu ba profesór

Hosi númeru kandidatu professór rihun 8-resin ne’e maiória mak aplika vaga rua tanba tuir formatu ne’ebé mak Ministériu Edukasaun fo sai katak kandidatu ida bele aplika vaga rua.

Koordenadór ne’e esplika, NGO Belun maka responsabiliza prosesu rekrutamentu ba bolsu kandidatu profesór hosi munisípiu Dili, Baucau, Bobonaro, Ermera no Viqueque ne’ebé hetan observasaun hosi Ministériu Edukasaun.

Enkuantu,  Ministériu Edukasaun maka responsabiliza munisípiu ualu, hanesan Aileu, Liquiça, Ainaro, Manatuto, Lautem, Covalima, RAEOA, Ataúro, no NGO Belun maka ajuda Ministériu Edukasaun hodi halo observasaun no simu dokumentu durante prosesu aplikasaun depois dadus hotu sei entrega ba Belun.

“Maibé atu dehan prosesu bolsu kandidatu profesór iha territóriu la’o di’ak no iha transparánsia no laiha irregularidade tanba verifikasaun ida-ne’e la’ós Ministériu Edukasaun mesak, maibé NGO belun mós partisipa hodi akompañia, verifika dadus no simu dadus,” nia hateten.

Prosesu rekrutamentu la’o ho transparánsia no mosu irregularidade tanba NGO Belun iha ninia ekipa hamutuk ema na’in-39 maka tulun Ministériu Edukasaun hodi halo observasaun.

Diretora Nasionál Rekursu Umanu hosi Ministériu Edukasaun, Anita Tavares de Jesus, hateten kandidatu hamutuk 8.601 maka aplika vaga bolsa kandidatu professór ne’e. Maibé husi totál kandidatu ne’e maiória aplika vaga rua, entaun totál dokumentu ne’ebé maka ministériu simu hamutuk 13.588.

“Ita atu dehan nune’e ninia fizikamente aplikante 8.601 maibé ninia aplikasaun iha 13.588. Agora aplikante 4.987 ne’e hili doubru entaun tenke teste dala rua, ida-ne’e ita tenke sura tanba ema ida teste dala rua,” dehan Diretora Nasionál ne’e iha Villa -Verde, Dili, kinta ne’e.

“Ha’u fó ezemplu katak aplikante ida hili ensinu báziku terseiru siklu, hili disiplina matemátika ho disiplina seluk tan entaun ita tenke sura hamutuk mak tenke to’o 13.558 ne’e. Ha’u klarifika no esplikasaun ba públiku katak aplikante 4.987 ne’e la’ós mate klamar maibé sira-ne’e hili referénsia ka aplikasaun rua mak soma hamutuk to’o 13.588,” nia klarifika.

Notísia Relevante :PM Xanana husu profesór ne’ebé kontratu ramata bele konkorre bolsa rekrutamentu

Jornalista   : Osória Marques

Editór           : Agapito dos Santos

iklan
iklan

Leave a Reply

iklan
error: Content is protected !!