DILI, 26 fevereiru 2024 (TATOLI)—Vise Ministru ba asuntu Parlamentár, Adérito Hugo da Costa, iha esperansa boot ba lideransa foun Indonézia nian [Prabowo Subianto] bele loké komunikasuan ba devolusaun ka entrega saudozu Nicolau Lobato ho erói sira seluk tan nia restu mortal.
Notísia Relevante: PN aprova rezolusaun kona-ba devolusaun restu mortál
“Esperansa boot katak ho ambiente foun iha polítika Indonézia ninian, ho lideransa foun Jenerál Reformadu Prabowo ne’ebé mezmu relasaun pasadu nakukun, maibé sente ida-ne’e komunikasaun besik, diskusaun mais aberta ho sira duké sira-ne’ebé iha pasadu la’ós nakukun ho ita. Entaun, ambiente polítika iha Jakarta bele ajuda ita atu loke komunikasaun ho espetativa ita-nia katak, ita presiza devolvimentu (devolusaun) ba restu mortal,” Vise Ministru ne’e hato’o hodi responde preokupasaun Deputadu sira-nian iha reuniaun plenária Parlamentu Nasionál (PN), segunda ne’e.
Nia dehan, ida-ne’e hanesan ajenda nasionál ida maibé atu atinje ida-ne’e presiza mós ambiente polítika iha nasaun ne’ebé halo koordenasaun.
“Ambiente polítika ida agora, ho vitória futuru Prezidente Prabowo ninian, espera nai veteranu sira mezmu iha pasadu nakukun ho sira, maibé hosi prátika esperénsia tinan 20 relasaun ho ita-nia veteranu sira nia komunikasaun amizade no besik liu ho eis jenerál sira-ne’ebé hala’o misaun iha Timor durante okupasaun,” nia dehan.
Ho kontaktu Estadu rua ne’e, hein katak bele iha solusaun ba Timor-Leste nia ezijénsia atu iha tempu ida ba devolvimentu restu mortál ba erói no eroina sira-ne’ebé mate iha tempu funu no agora lahatene sira-nia restu mortál iha ne’ebé.
Iha reuniaun plenária PN, segunda ne’e, Deputadu FRETILIN, David dias Ximenes ‘Mandati’ no Deputa Helena Martins ho Deputadu CNRT, Domingos Deker, kontinua husu ba Governu atu aproxima nafatin ho Indonézia hodi haree asuntu restu mortál saudozu Nicolau Lobato ho sira seluk ne’ebé ohin loron seidauk hetan ninia ruin, hodi nune’e bele haloot ho iha fatin dignu.
Notísia Relevante: Deputadu PN husu IX Governu buka-tuir Nicolau Lobato nia ruin
Jornalista : Nelson de Sousa
Editór : Cancio Ximenes
