DILI, 26 fevereiru 2024 (TATOLI)-Polísia Nasionál Timor-Leste (PNTL) liuhusi Departamentu Tránzitu Seguransa Rodaviaria Nasionál hetan apoiu motor batedór lima ho tipu CFMOT husi Embaixada Xina iha Timor-Leste (TL) hodi utiliza ba seguransa ba alta entidade iha rai-laran no ba alta entidade ne’ebé vizita nasaun ne’e.
“Apoiu ida ne’e mai hosi proposta atuál Segundu komandante Jerál PNTL, Komisariu Pedro Belo ne’ebé mak momentu sei asume kargu hanesan Komandante komandu operasaun nasionál PNTL iha 2022. Nia husu ba Embaixada China atu hetan tulun liliu ba motór tanba ne’e Embaixada Xina entrega motorizada lima mai ita no ohin ita simu ona,” Xefe Departamentu Tránzitu Seguransa Rodaviaria Nasionál, Asistente Superintendente Polísia, Luis da Costa hateten ba jornalista sira iha nia kna’ar fatin segunda, ohin.
Luis da Costa dehan, Komandu PNTL halo proposta ba Embaixada Xina hodi apoiu motór ba Komandu tanba Polísia Militar hetan mós apoiu hosi Embaixada Xina kona-ba motor batedór.
Tanba ne’e mak Komandante Operasaun momentu ne’ebá hamutuk Komandante Jerál ho hanoin ida halo oinsá atu bele halo proposta ka pedidu ba iha Embaixada Xina atu bele tulun motorizada Batedór ba PNTL ba polísia tránzitu nasionál atu oinsá utiliza asegura alta entidade rai-laran liuliu alta entidade órgaun soberanu haat no alta entidade sira hosi rai-li’ur.
Komandante Luis lori komandu jerál PNTL agradese tebes ba apoiu hosi Embaixada Xina.
“PNTL liuhosi tránzitu Nasionál kontenti simu apoiu hirak ne’ebé mak oferese hosi Enbaixada Xina ami agradese no fó obrigadu barak ba Embaixada Xina liuhosi kooperasaun bilaterál bele fó apoiu batidores ne’e ba PNTL liliu mai tránzitu,” nia adianta.
Autoridade polisiál ne’e dehan, ho apoiu ida-ne’e bele apoia servisu polísia tránzitu nasionál tanba motorizada Batidór PNTL nian iha haat mak hetan estragu kauza hosi inundasaun iha tinan hirak liubá nune’e mak polísia tránzitu iha problema kona-ba Batedór sira liliu atu halo eskoltu ba asegura superiór sira ba atividade servisu sira.
“Ho tulun ida ne’e, PNTL liliu Polísia Nasionál Tránzitu fiar katak sei halo servisu di’ak liután hosi apoiu hirak ne’ebe mak Enbaixada Xina fó mai PNTL,” nia konklui.
Notísia relevante:Xina kontinua hametin kooperasaun ba dezenvolvimentu agrikultura iha TL
Jornalista: Natalino Costa
Editór: Rafael Ximenes de A. Belo
