DILI, 12 dezembru 2023 (TATOLI)—Embaixadór Xina iha Timor-Leste, Wáng Wén Lì, hateten Embaixada Xina iha Timor-Leste kontinua apoiu no promove konsensu atu hametin amizade entre nasaun rua, hodi hametin implementasaun projetu ne’e, atu kontribui kualidade no hametin kooperasaun inklui dezenvolvimentu agrikultura iha Timor-Leste (TL).
Notísia Relevante: Governu husu Provínsia Hunan alarga atividade agríkola iha Manatuto no envolve komunidade
“Ami sei asiste nafatin projetu ne’e, atu hasa’e nafatin nia kualidade to implementasaun projetu ne’e remata. Ami espera katak populasaun sira-ne’ebé mak iha Manatuto, atu apoiu nafatin no mós aprende nafatin buat ne’ebé mak ami-nia ema tékniku sira atu fó ba ita-boot sira,” Embaixadór Xina ne’e liuhosi nota ne’ebé Agência Tatoli, tersa ne’e.
Governadór ba Provínsia Hunan, Mao WeiMing, hateten Hunan hanesan provínsia boot ida ba Agrikultura no haki’ak fahi iha Xina, no Hunan mak iha pozisaun oin liu kona-ba haki’ak fahi iha Xina.
Iha tinan 2023, durante fulan sia (9) nia-laran, Hunan prodús fahi hamutuk 4.621, nune’e iha Xina asuntu kona-ba haki’ak Fahi ne’e Provinsia Hunan mak okupa segundu Lugar.
Hunan no Timor-Leste hanesan kolega di’ak ne’ebé apoiu malu tebes no nasaun rua ne’e mós iha baze di’ak ba kooperasaun no interkámbiu.
Iha fulan-setembru tinan ida-ne’e, Prezidente Repúblika Populár Xina, Xi Jingping no Primeiru-Ministru RDTL, Kay Rala Xanana Gusmão, tuir konsensu kooperasaun iha Hangzhou, deside atu hasa’e relasaun bilaterál entre Timor ho Xina kona-ba parseria estratéjika.
Katak, presija atu haforsa kooperasaun entre munisípiu Manatuto ho Provínsia Hunan no implementa projetu ba kuda modo, Pekuária no Agrikultura.
Tanba ne’e, iha segunda (11 dezembru 2023) ne’e, Provínsia Hunan no Munisípiu Manatuto lansa ona fatuk dahuluk ba fatin hodi haki’ak fahi, ne’ebé lokaliza iha aldeia Carlilu, suku Aiteas, postu administrativu Manatuto Villa, munisípiu Manatuto.
Ministériu Administrasaun Estatál (MAE), Tomás do Rosário Cabral, husu ba Administrasaun Munisipál Manatuto atu tau matan ba iha implementasaun akordu ne’e liuliu servisu agrikultura munisípiu nian.
Tanba, akordu kooperasaun ida-ne’e entre Provínsia Hunan ho populasaun Munisípiu Manatuto, ne’ebé mak inisia Primeiru-Ministru, Kay Rala Xanana Gusmão, ho Provínsia Hunan Xina.
Nia hateten, projetu kona-ba haki’ak fahi hosi Hunan no Manatuto, organiza hosi Departamentu Agrikultura no Assuntu Rurál Provínsia Hunan no implementasaun espesífiku projetu ne’e realiza hosi Yuancheng Agricultural Science & Technology Development Co, Ltd, hosi Hunan.
“Planu katak atu halo fatin ba haki’ak fahi foun hamutuk 400 no fatin ba produsaun fahi hamutuk 220, hafoin halo kompleta projetu ida-ne’e, sei hatama fahi 300 ba merkadu Timor-Leste kada tinan,” nia dehan.
Iha tempu ne’ebé hanesan, sei halo mós formasaun teknólojia kona-ba pekuária no haki’ak manu, inklui teknólojia ba biogas iha Timor, atu hanorin tékniku funsionáriu no to’os-ma’in atu habelar liután haki’ak fahi lokál, hasa’e nivel jerál indústria ba produsaun fahi iha Timor-Leste.
“Hasa’e kapasidade ba prevensaun no kontrola moras hosi fahi no halo seguransa ba fahi. Hasa’e populasaun nia nutrisaun, hasa’e rendimentu ekonomia ba komunidade ne’ebé hakarak haki’ak fahi iha Timor, no promove dezenvolvimentu ekonómia sosiál iha Timor ho rápidu,” nia dehan.
Notísia Relevante: Timor-Leste no Provínsia Hunan Xina reafirma akordu kooperasaun
Jornalista : Osória Marques
Editór : Cancio Ximenes
