DILI, 26 fevereiru 2024 (TATOLI)—Reprezentante povu iha Parlamentu Nasionál (PN) liuhosi Deputadu CNRT, Natalino dos Santos ho José Virgílio Perreira, husu Governu atu reativa Border Pass iha liña fronteira terrestre.
Notísia Relevante: Xefe suku Holsa ezije Governu reativa produsaun Border Pass
“Populasaun iha Fronteira uza Border Pass ne’e hapara iha tempu COVID-19, nune’e husu reativa fali tiha hodi fasilita populasaun hakat ba timor osidentál (sorin),” Deputadu Natalino dos Santos levanta asuntu ne’e liuhusi reuniaun plenária PN, segunda ne’e.
Deputadu José Virgílio Perreira mós reforsa hodi hateten atu reativa Border Pass iha fronteira terrestre hodi fasilita populasaun sir abele la’o ba-mai entre Timor-Leste ba Timor-Osdintál no hosi Timor Osidentál mai Timor-Leste.
Antes ne’e iha tinan 2023, Xefe Suku Holsa, postu administrativu Maliana, munisípiu Bobonaro, António Santa Cruz, husu ba Governu liuousi ministériu kompetente atu reativa atendimentu produsaun karta Border Pass hodi fasilita sidadaun sira iha liña fronteira.
Governu Timor-Leste ho Indonézia iha akordu ida hodi fó kartaun Border Pass ba sidadaun Timor-Leste no sidadun Indonézia ne’e hodi ultrapasa fronteira ba-mai ho legál.
Jornalista : Nelson de Sousa
Editór : Cancio Ximenes
