DILI, 28 fevereiru 2024 (TATOLI)–Ministériu Saúde (MS) liuhosi Servisu Nasionál Ambulansia no Emerjensia Médiku (SNAEM) no Servisu Saúde munisípiu Dili fó formasaun salva vida ka primeiru sukoru ba profisionál saúde 30-resin iha Hospital Nasionál Guido Valadares Bidau, Dili.
“Objetivu fó formasaun ba profisionál saúde sira atu asegura ita-nia sarani sira iha misa iha igreja Dili laran no sarani sira-ne’ebé sei partisipa iha viasakra iha Cristo Rei no Golgota Comoro nian. Ida-ne’e atu fortifika atividade sokoru ba sarani sira iha misa santa paskua no bainhira Papa Francisco vizita Timor-Leste,” Diretór Nasionál SNAEM, Simplicio Amaral de Deus, hateten ba jornalista sira iha HNGV Bidau, kuarta ne’e.
Nia hateten, baibain iha misa boot sira hanesan misa semana santa iha paskua ne’e sarani barak mak monu no dezmaia, tanba ne’e mak MS foti inisiativa hodi forma ekipa no koloka profisionál saúde sira iha igreja sira iha Dili hanesan Katedrál, Motael, Balide no Becora.
Ekipa primeiru sokoru ne’e sei envolve direta Cruz Vermelha Timor-Leste (CVTL) hodi bele fo apoiu no integra iha atividade sokoru iha santa misa paskua nian.
Diretór Servisu Saude munisípiu Dili, Mateus Pinto, hateten hosi profisionál saúde 30-resin ne’e iha profisionál saúde hamutuk lima (5) hosi sentru saude lima iha Dili mak partisipa iha formasaun refere.
“Preparasaun ne’e la’ós de’it ba iha misa páskua de’it, maibe ba eventu boot sira no vizita importante sira hanesan mós Papa Francisco mai vizita Timor-Leste. Ekipa ida-ne’e mak sei kontinua atende eventu boot sira ne’e,” nia hateten.
Diretora Ezekutiva Hospital Nasional Guido Valadares (HNGV), Cecilia Barros Mendonça, hateten maske vizita Papa nian seidauk iha data fiksu hodi vizita Timor-Leste, maibé formasaun ne’e mós ho objetivu ida preparasaun ba vizita Papa nian.
Jornalista : Jesuína Xavier
Editór : Cancio Ximenes
