DILI, 28 fevereiru 2024 (TATOLI)—Membru Parlamentu Nasionál (PN) liuhosi Deputadu CNRT, Saul Salvador, konsidera Timor-Leste (TL) adere ona ba Organizasaun Mundiál Komérsiu (OMK) sei fó espasu liután ba Timor-Leste (TL) asesu merkadu globál.
Notísia Relevante: EUA kongratula TL nia adezaun ba OMK
“Sente orgulu tebes, tanba Timor-Leste bele adere ona ba Organizasaun Mundiál Komérsiu (OMK). Ida-ne’e parte ida fó espasu luan liután iha área ekonómia liuliu komérsiu ninian halo Timor-Leste bele asesu ba merkadu globál. Entaun, oportunidade di’ak tebe-tebes ba Timor bele hakat ba oin,” Deputadu CNRT ne’e hateten ba Agência Tatoli iha PN, kuarta ne’e.
Vantajen seluk, nia hateten, Estadu oinsá foka ona oinsá hasa’e produsaun rai-laran, produtu ida-ne’ebé mak bele esporta ba rai-li’ur no mós fó oportunidade ba membru OMK bele mai investe iha iiha Timor iha setór komérsiu ninian.
“Agora, ita mós se tama ona iha ne’eba presiza haree pilár tolu hanesan rekursu umanu, ba setór privadu sira no ida seluk presiza haree lei sira presiza halo ajustamentu kona-ba lei OMK ho ita-nian, liuliu lei investimentu privadu no lei sosiedade komersiál importante ajusta tuir ita-nia kondisaun,” Nia hateten.
Tuir nia, preparasaun setór privadu atu kompete hanoin Estadu mós tenke hanoin daudaun oinsá suporta ita-nia setór privadu sira hodi kapitaliza sira.
Tuir Deputadu hosi bankada Governu ne’e nia haree, setór privadu iha kapasidade entermu jestaun sira iha maibé falta kapital atu promove sira-nia atividade, entaun Estadu nia papel oinsá apoiu setór privadu nasionál hodi sira bele kompete.
Nia rekomenda ba governante sira-ne’ebé tutela ba asuntu komérsiu no ekonomia nian atu bele esforsu aan daudaun. prepara dezemvolve TL nia ekonomia iha rai-laran ne’e ho didi’ak liuliu setór produtivu sira oinsá mak Timor-Leste iha produtu rasik esporta ba rai-li’ur.
Antes ne’e, Komisaun D trata asuntu Ekonómia no Dezenvolvimentu iha PN, lideradu Deputadu Ricardo Baptista, halo audiénsia ho Ministru Komérsiu Indústria (MKI), Nino Filipus Pereira, hodi ko’alia kona-ba planu lejislasaun iha tinan ne’e inklui lejislasaun sira-ne’ebé liga ba adezaun TL ba OMK.
Iha bibán ne’e, Deputadu membru komisaun mós aprezenta hanoin propoin atu altera lei investimentu privadu ho sosiedade komersiál atu presiza armoniza didi’ak.
Notísia Relevante: Kronolojia adezaun Timor-Leste ba OMK husi ínisiu to’o ofisiál
Jornalista : Nelson de Sousa
Editór : Cancio Ximenes
