iklan

EKONOMIA, INTERNASIONÁL

Kronolojia adezaun Timor-Leste ba OMK husi ínisiu to’o ofisiál

Kronolojia adezaun Timor-Leste ba OMK husi ínisiu to’o ofisiál

Foto hamutuk iha ámbitu asinatura formalizasaun asinatura deklarasaun sai membru OMK. Imajen Tatoli/Joanico de Araújo

DILI, 27 fevereiru 2024 (TATOLI) – Iha loron 26 fevereiru, Timor-Leste formalmente asina ona deklarasaun hodi sai membru ba Organizasaun Mundiál Komérsiu (OMK).

Durante tinan ualu, Governu kontinua troka malu maibé kompromisu mantein. Nune’e, husi Governasaun ida ba Governasaun seluk, liuhusi esforsu oioin, ikusmai Timor-Leste bele to’o iha konkluzaun ida. Katak, ofisialmente sai membru ba OMK.

Oinsá prosesu inisiál to’o ofisiál, tuirmai TATOLI hakarak introdús kronolojia oinsá Timor-Leste hahú aplika to’o asina deklarasaun ofisiál adezaun nu’udar membru plenu:

KRONOLOJIA

Prosesu inisiál

Timor-Leste nia esforsu adere ba Organizasaun Mundiál ba Komérsiu (OMK) inísia iha loron 07 dezembru 2006, liuhosi kriasaun Grupu Traballu, nune’e hafoin tinan 14, Grupu Traballu prepara dokumentu nesesáriu sira hodi kumpre regra organizasaun.

OMK nu’udar organizasaun internasionál únika ne’ebé regula atividade komérsiu internasionál. Organizasaun ne’e harii iha tinan 1995 no prezensa OMK ho nia objetivu bazeia ba akordu hodi fó auxília ba produtór sasán, esportadór no importadór hosi kada nasaun hodi dezempeña sira-nia atividade komérsiu tuir regra internasionál hodi garante seguru no transparénsia.

Aleinde ne’e, organizasaun ne’e bele regula komérsiu entre país sira ho objetivu atu garante katak atividade komersiál hotu la’o ho forma fasil, livre, previzível no posível.

OMK ninia objetivu prinsipál mak atu regula no fasilita komérsiu internasionál entre nasaun membru sira, liuhosi hamenus barreira ba esportasaun no importasaun. Hodi atinje ida-ne’e, estadu membru OMK sira hotu tenke muda sira-nia polítika internál sira ne’ebé karik kontradís ho prinsipiu merkadu livre nian.

Governu Timor-Leste simu delegasaun ida hosi OMK, iha novembru 2016, hodi diskute kona-ba Timor-Leste nia aplikasaun atu adere ba organizasaun ne’e, ne’ebé Governu nia ofisiál sira haktuir prosesu adezaun ba organizasaun sei ajuda ‘hametin no haburas ekonomia liuhosi investimentu estratéjiku iha setór potensiál sira,’ no hateten katak sai membru OMK ne’e importante tebes atu asegura katak Timor-Leste bele diversifíka ninia ekonomia iha komérsiu, indústria no agrikultura ba esportasaun no asesu ba merkadu.

Estatutu hanesan observadór

Planu Governu Timor-Leste atu sai membru ida ho direitu tomak hosi OMK fó tán pasu ida, ho anúnsiu hosi Konsellu Jerál Organizasaun ne’e nian atu fó estatutu hanesan observadór no atu kria Grupu Traballu ida hodi halo negosiasaun kona-ba kondisaun sira ba adezaun.

Anúnsiu ne’e fó sai iha sorumutuk ida ne’ebé órgaun ne’e hala’o iha Jenebra (Suísa) iha loron 07 dezembru 2016.

Durante sorumutuk, Ministru Estadu, Koordenadór Asuntu Ekonómiku no Ministru Agrikultura no Peska, Estanislau da Silva, hateten katak adezaun ba OMK hanesan objetivu prinsipál Governu nian ne’ebé boot, hodi harii institusionál no polítika ekonómika rai-li’ur. Aleinde ne’e adezaun ba organizasaun tama ba programa Governu hodi aselera kreximentu no fó apoiu ba diversifikasaun ekonómika.

Ministru Estadu esplika ona katak hadi’a asesu ba merkadu sira, hanesan mós hosi oportunidade sira ba komérsiu, halo parte hosi inisiativa polítika Governu hodidada no hasa’e investimentu iha área produtiva ekonomia hanesan agrikultura, peska, turizmu, indústria ki’ik no minerasaun, aleinde atividade mina-rai no gás, no ida mós mak hadi’a infraestrutura ekonómika no ambiente negósiu sira.

Governu konsidera adezaun ba OMK ne’e hanesan prosesu ida hodi kompleta adezaun ba Asosiasaun Nasaun Sudeste Aziátiku (ASEAN) no kontribusaun importante ida ba partisipasaun ekonómika iha rejiaun.

Iha loron 16 dezembru 2016, Governu Timor-Leste hetan ona estatutu hanesan observadór hosi OMK, ne’ebé fó oportunidade atu partisipa iha enkontru sira durante prosesu adezaun nian.

Nune’e, Timor-Leste hamutuk ho país 22 seluk sai observadór hodi akompaña prosesu no kumpre rekezitu hodi sai membru hanesan ho nasaun 164 sira seluk.

Hanesan país observadór, Grupu Traballu hanesan komité traballu hodi halo preparasaun, negosiasaun, prienxe rekezitu no tuir enkontru koordenasaun ho Estadu membru.

Reuniaun Grupu Traballu

Iha loron 01 outubru 2020, Timor-Leste realiza enkontru Grupu Traballu dahuluk ho nasaun membru OMK sira hodi diskute kle’an kona-ba seriedade aplikasaun sai membru planu.

Adezaun ba organizasaun mundiál ne’e ho hanoin ida katak Governu bele halo parseria ho setór privadu nasionál no internasionál atu loke kampu traballu ba timor-oan.

Reuniaun Grupu Traballu ba daruak ne’ebé fasilita hosi Sekretariadu Adezaun Timor-Leste ba OMK hosi Ministériu Koordenadór Asuntu Ekonómiku (MKAE) hala’o iha salaun enkontru Ministériu Negósiu Estranjeiru no Kooperasaun no hetan partisipasaun másimu hosi membru Governu hanesan Ministru Koordenadór Asuntu Ekonómiku, Joaquim Amaral, Ministru Finansa, Rui Gomes, Ministru Turizmu, Komérsiu no Indústria, José Lucas do Carmo da Silva, Vise-Ministru Komérsiu no Indústria Domingos Lopes.

Notísia relevante: https://tatoli.tl/2023/10/17/timor-leste-konklui-ona-negosiasaun-adezaun-ba-omk/

Reuniaun Grupu Traballu ne’e hatudu sinál pozitivu ba pozisaun Timor-Leste nian ne’ebé hato’o hosi paiís membru OMK sira kona-ba vontade Timor-Leste hodi adere ba OMK. Hosi kontinente Europea, liuhosi reprezentante Uniaun Europea elojia no apresia tebes ba esforsu Governu Timor-Leste iha faze preparasaun no elaborasaun dokumentu nesesáriu sira, ne’ebé haktuir hosi regra OMK nian.

Notísia relevante: https://tatoli.tl/2024/02/12/26-fevereiru-timor-leste-asina-pakote-adezaun-ba-omk-iha-abu-dhabi/

Grupu Traballu konsege realiza reuniaun dala-neen, ne’ebé reuniaun dahuluk realiza iha 01 outubru 2020, daruak iha 29 jullu 2021, datoluk iha 29 abril 2022, dahaat iha 30 setembru 2022, dalimak iha 20 abríl 2023 no reuniaun datoluk 11 outubru 2023, ne’ebé hosi reuniaun hirak ne’e konsege hola forma iha nível tolu trata ne’ebé asuntu multilaterál, bilaterál no plurilaterál.

Notísia relevante: https://tatoli.tl/2024/02/26/timor-leste-formalmente-asina-ona-deklarasaun-sai-membru-omk/

 

Tatoli

 

iklan
iklan

Leave a Reply

iklan
error: Content is protected !!