João Gonçalves sei dezloka ba Filipina atu diskute asuntu investimentu
OÉ-CUSSE, 29 fevereiru 2024 (TATOLI) – Koordenadór Ezekutivu Zona Espesiál Ekonómia Dezenvolvimentu Oé-Cusse Ambeno (ZEEDOA), João Mendes Gonçalves, sei dezloka ba nasaun Filipina hodi hasoru malu investidór sira atu deskuti ba futuru kooperasaun iha área investimentu nian.
“Ha’u sei dezloka ba Filipina, atu hasoru nafatin ita-nia investidór balun iha-ne’ebá, ne’ebé sira hakarak mai investe iha-ne’e, tanba sira ko’alia ona ho Primeiru Ministru no Prezidente Repúblika,” João Mendes Gonçalves, ko’alia iha Oé-Cusse, kuarta ne’e.
Notísia relevante: João Gonçalves sei submete relatóriu estabelesimentu ZEESM bá Konsellu Ministru
Daudaun ne’e João Mendes Gonçalves hato’o ona karta koñesimentu ba Prezidente Autoridade RAEOA, Rogério Tiago Lobato no ajenda dezlokasaun sei fiksa.
“Primeiru Ministru dehan, investidór sira presiza ko’alia direita ho ami, ne’ebé ha’u informa ona ba Prezidente Autoridade, no delega ha’u mak ba de’it, tanba ami na’in-rua labele sai hotu, ida tenke kontinua mantein iha-ne’e,” nia afirma.
Koordenadór Ezekutivu ne’e, fundamenta, daudaun ne’e kontinua prepara relatóriu kona-b’a estabelesimentu ZEESM iha Oé-Cusse, atu aprezenta iha Konsellu Ministru, nune’e iha futuru sei identifika poténsia sira-ne’ebé eziste iha Oé-Cusse.
Nia informa, bainhira remata vizita ofisiál iha Filipina, sei aprezenta relatóriu ba Governu no Estadu, kona-bá tipu investimentu nian.
“Depois ami sei aprezenta relatóriu kona-bá enkontru sira-ne’ebé ami halo, maibé potensiál investidór sira hasoru ona ho Prezidente Repúblika ho Primeiru Ministru, ne’ebé hakarak mai investe iha RAEOA.
Notísia relevante:ZEESM no SERVE diskute atu estabelese balkaun úniku iha Oé-Cusse
Entretantu, João Mendes Gonçalves, hetan nomeasaun hosi IX Governu Konstitusionál lideradu Primeiru Ministru Kay Rala Xanana Gusmão, no simu pose nu’udar koordenadór ZEESM, no dezigna Régio da Cruz Salu no Herculano de Sousa hanesan Vise-Koordenadór.
Jornalista: Abílio Elo Nini
Editór: Evaristo Soares Martins
