iklan

EKONOMIA, HEADLINE, MUNISÍPIU, OÉ-CUSSE (RAEOA)

ZEESM no SERVE diskute atu estabelese balkaun úniku iha Oé-Cusse

ZEESM no SERVE diskute atu estabelese balkaun úniku iha Oé-Cusse

Koordenador ZEESM halo diskusaun ho SERVE sukursal Oe-Cusse, atu estabelese one stop shop iha RAEOA. Imajen mídia ZEESM.

OÉ-CUSSE, 08 fevereiru 2024 (TATOLI) – Koordenadór Zona Espesiál Ekonomia Sosiál Merkadu (ZEESM), João Mendes Gonçalves no Koordenadór Servisu Rejistrasaun no Verifikasaun Emprezariál, Institutu Públiku (SERVE,IP), sukursál Oé-Cusse, Reinaldo António Mendonça, halo diskusaun atu estabelese one stop shop (balkaun úniku) iha Rejiaun Administrativa Espesiál Oe-Cusse Ambeno nune’e fasilita emprezáriu sira trata lisensiamentu kompañia.

“Ami ko’alia kona-bá nesesidade atu estabelese one stop shop iha Oé-Cusse ba investidór sira- hakarak mai investe iha Oé-Cusse karik, atu trata sira-nia dokumentu lalika halai tún sa’e ba iha departamentu ne’ebé sira presiza, maibé ba iha fatin ida de’it atu entrega pedidu iha-ne’ebá, tanba iha-ne’ebá sei iha institusaun relevante hotu-hotu, ne’ebé bele kontribui ba sira-nia lisensiamentu bele trata ho lais,” João Mendes Gonçalves, ko’alia hafoin remata enkontru iha salaun ZEESM Oé-Cusse, kinta ne’e.

Notísia relevante:RAEOA konstrui sentru emprezaríal

Joãn Gonçalves, informa durante iha sorumutu ne’e, parte SERVE mós aprezenta difikuldade barak kona-bá edifísiu no kontratu ba funsionáriu sira, tanba servisu SERVE iha ligasaun ba aban bainrua nian.

“Bainhira ita prepara ona planu dezenvolvimentu Oé-Cusse nian aprezenta iha Konsellu Ministru, entaun problema balu ne’ebé sira enfrenta daudaun, presiza rezolve iha tempu badak, tanba SERVE hanesan instituisaun públika ida, ne’ebé depende ba iha nasionál, maibé antes ne’e iha akordu kooperasaun ho RAEOA, ne’e duni ita tenke mantein tanba servisu SERVE nian importante,” nia katak.

Nia esplika, difikuldade ne’ebé SERVE propoin, maka edifísiu tanba Governu anteriór konstrui ona edifísiu, maibé daudaun ne’e edifísiu ne’e seidauk entrega ba utilizasaun.

Asuntu seluk, kona-bá kontratu funsionáriu sira iha SERVE tanba SERVE instituisaun ne’ebé maka emite lisensiamentu ba emprezáriu sira, ne’ebé hakarak mai loke atividade negósiu ka loke empreza iha rai laran.

“Tanba ne’e ami sei esforsa-aan atu rezolve iha tempu badak, maibé ida-ne’e hotu kompeténsia tomak iha Prezidente Autoridade, ha’u sei koordena servisu hamutuk ho Prezidenti Autoridade ita bele buka solusaun ida urjente ba asuntu ne’e,” nia promete.

Notísia relevante: João Gonçalves sei submete relatóriu estabelesimentu ZEESM bá Konsellu Ministru

Jornalista: Abílio Elo Nini

Editór: Evaristo Soares Martins                

iklan
iklan

Leave a Reply

iklan
error: Content is protected !!