DILI, 29 fevereiru 2024 (TATOLI)—Parlamentu Nasionál (PN) halo ona ajenda ba reuniaun plenária hodi hala’o eleisauní ba Komisáriu Komisaun Anti-Korrupsaun (CAC, siglá portugés) iha 05 marsu 2024 semana oin.
Notísia Relevante: Bankada parlamentár seidauk iha konsensu ba eleisaun komisáriu CAC
“Ohin, ami reuniaun líder bankada ne’ebé dirije hosi Primeira Vise Prezidente Parlamentu, Teresinha Viegas, deside ona hodi ajenda katak iha tersa (05 marsu) sei iha eleisaun ba komisáriu CAC nian,” Primeira Sekretária Meza PN, Deputada Maria Teresa Gusmão, hateten ba jornalista sira hafoin reuniaun líder bankada parlamentár iha sala konferénsia PN, kinta ne’e.
Nia hateten, eleisaun ba komisáriu CAC ne’e iha ona konsensu liuliu entre bankada boot rua liuliu CNRT ho FRETILIN.
Vise bankada FRETILIN, Deputada Maria Angelica Rangel, hateten nia-parte reprezenta bankada ne’ebé partisipa mós iha reuniaun líder bankada hodi diskute deside ajenda ba eleisaun komisáriu CAC ne’e rasik.
“Maibé, ohin, diskute tanba agora daudaun líder (xefe) bankada sira sei iha hotu rai-li’ur, tanba ne’e ohin vise bankada sira mak tuir reuniaun líder bankada ne’ebé lidera husi Vise Prezidente PN, diskute asuntu sira-ne’ebé temi ajenda eleisaun komisáriu CAC sei hala’o dia 05 marsu. Ba CAC, ami hanoin katak regra mak ne’e depois lori ba reuniaun líder bankada hotu tiha. Ami fila-fali mai bankada sei reune depois mak sei halo desizaun ba ajenda ne’ebé mak kona-ba komisáriu CAC ne’e,” nia hateten.
Tanba ne’e, Vise bankada FRETILIN ne’e hateten nia-parte sei aprezenta asuntu ne’e iha bankada rasik hodi halo fali reuniaun iha bankada hafoin sei foti desizaun.
“Konsensu seidauk iha, maibé depois reuniaun bankada depois ami aprezenta tanba atu halo eleisaun ba CAC lei ezije deputadu na’in 49 tenke prezente mak foin hodi halo eleisaun, se laiha kórum, ida-ne’e entaun labele. Tanba ne’e, ami hanoin sei lori fali diskute iha bankada hodi halo desizaun oinsá mak partisipa. Konsensu ha’u lada’uk hatene, maibé karik iha reuniaun seluk, prezidente bankada seidauk mai, tanba ne’e sei iha reuniaun bankada halo desizaun ne’e,” nia hateten.
Antes ne’e mós Vise bankada CNRT, Deputadu Patrocínio dos Reis Fernandes, hateten nu’udar bankada Governu sei buka konsensu ho parte opozisaun ba eleisaun komisáriu CAC ne’e rasik.
Antes ne’e, Segundu Sekretária Meza Parlamentu Nasionál (PN), Deputada Bendita Monis Magno, informa Governu haruka ona, naran Rui Pereira dos Santos, nu’udar kandidatu lista úniku ba Komisáriu Komisaun Anti-Korrupsaun (CAC, siglá portugés) ba PN.
“Governu haruka ona mai kandidatura ba iha komisáriu CAC, karta foin simu iha loron hirak liu ba, no Governu haruka ema ida de’it mai Parlamentu, hotu-hotu hatene Governu haruka mak señor Rui (Pereira dos Santos) atu ba iha komisáriu CAC,” Segundu Sekretária Meza PN ne’e hateten ba jornalista sira iha PN, foin lalais ne’e.
Tuir lejislasaun ne’ebé vigora, naran sira-ne’ebé propoin hosi Governu sei analiza no vota hosi PN no sira-nia designasaun sei presiza maiória absoluta hosi Deputadu ne’ebé marka prezensa, pelumenus ¾ hosi Deputadu ho funsaun efetiva.
Notísia Relevante: Governu submete naran Rui Pereira nu’udar kandidatu úniku ba komisáriu CAC
Jornalista : Nelson de Sousa
Editór : Cancio Ximenes
