iklan

BOBONARO, HEADLINE, MUNISÍPIU, SAÚDE, SOSIEDADE SIVĺL

Evita kazu soe Bebé, Xefe suku Holsa sei esforsu halo edukasaun sívika

Evita kazu soe Bebé, Xefe suku Holsa sei esforsu halo edukasaun sívika

Xefe suku Holsa, António Santa Cruz. Imajen Tatoli/Sérgio da Cruz.

BOBONARO, 01 marsu 2024 (TATOLI)-Xefe suku Holsa, postu administrativu Maliana, munisípiu Bobonaro, António Santa Cruz, sei halo esforsu hodi serbisu hamutuk ho Organizasaun Naun Governamentál sira atu halo edukasaun sívika ba komunidade sira, liuliu joven sira-ne’ebé idade produtivu ne’ebé eziste iha aldeia neen atu evita kazu soe Bebé iha futuru.

Santa Cruz, hato’o kestaun ne’e ligadu ho kazu soe Bebé feto oan ida-ne’ebé akontese iha mota Sagui, bairru SMP2, aldeia Oplegul, suku Holsa, postu administrativu Maliana, munisípiu Bobonaro, iha loron-segunda (26/02) liubá.

Notísia relevante: PNTL asegura ona autór ne’ebé soe bebé iha SMP2 Maliana

“Hau sei servisu hamutuk ho ONG sira-ne’ebé eziste iha nasaun ne’e hanesan FOKUPERS, Rede Feto no sira seluk tán ne’ebé maka servisu iha área feto ninian, atubele mai partila informasaun kona-bá situasaun ida-ne’e no atu mai sensibiliza informasaun kle’an liu ba komunidade suku Holsa,” nia informa ba jornalista sira iha Holsa, sesta ne’e.

Nu’udar umanu, nia parte triste no lamenta tebes ho asaun refere tanba primeira vez foin akontese iha suku Holsa.

Kona-bá kazu refere, líder komunitária ne’e komenta, inan ne’e ladún iha konsiénsia no koñesimentu ne’ebé kle’an, tanba bele foti desizaun hakotu vida Bebé ne’ebé konsidera inosente hela.

“Problema ne’e loloos sei iha solusaun, sé nia lakohi ka família la simu, bele fó ema seluk hakiak, ema barak mak hakarak,” Xefe suku ne’e preokupa.

Nia dehan, Kazu ne’e sai hanesan lisaun ida ba inan feton sira iha suku Holsa, atu aprende didi’ak, nune’e ba futuru hasoru situasaun hanesan ne’e labele taka-aan deit, maibé tenke nakloke ba ema ruma atubele fó hanoin.

Enkuantu autór ba kazu refere daudaun ne’e Polisía Nasionál Timor-Leste Munisípiu Bobonaro, asegura ona hodi halo prosesu identifikasaun no Bebé feto ne’e prezerva hela iha Hospital Nacional Guido Valadares (HNGV), Bidau, Dili hodi hein prosesu imlnvestigasaun.

Notísia relevante: PNTL Bobonaro: Bebé ne’ebé mate iha Maliana kauza hosi ema buti kakorok

Jornalista: Sergio da Cruz
Editór: Evaristo Soares Martins

iklan
iklan

Leave a Reply

iklan
error: Content is protected !!