iklan

KAPITÁL

Hadomi Timor-Leste labele so’e lixu arbiru

Hadomi Timor-Leste labele so’e lixu arbiru

Ekipa saneamentu rekolla hela lixu iha kapitál Dili. Imajen Tatoli/António Daciparu

DILI, 01 marsu 2024 (TATOLI)-Koordenadór hosi Grupu Defeza Ambiente (GDA), Delvio da Costa Sequeira, husu ba sidadaun hotu atu hadomi Timor-Leste hodi labele so’e lixu arbiru.

Notísia Relevante: Durante ne’e, AMD kontratu Empreza lima hodi rekolla lixu iha Dili

“Sé ó hadomi Timor-Leste, ó sei proteje nia. Lixu ne’e la’ós Governu mak iha kompeténsia, maibé lixu ne’e ema hotu-hotu nia kompeténsia (responsabilidade), katak ó-nia lixu ne’e ó-nia responsabilidade, soe lixu tenke ho responsabilidade. Mai ita hadomi ita-nia ambiente, labele soe foer arbiru,” Koordenadór husi Grupu Defeza Ambiente ne’e hateten ba Agência Tatoli liuhosi programa “Entervista Eskluziva” iha estúdiu Faról, sesta ne’e.

Nia preokupa ho problema lixu ne’ebé ohin loron sai preokupasaun iha kapitál Dili, tanba kauza hosi konsiénsia sidadaun kontinua soe lixu arbiru, nune’e presiza ema hotu nia konsiénsia atu labele so’e lixu arbiru.

Tanba, nia dehan, soe lixu arbiru ninia impaktu mak afeta ba inundasaun iha tempu udan, ambiente rasik, saúde públiku, biodiversidade iha tasi no halo imajen kapitál Dili sai sidade ne’ebé nakonu ho lixu.

Aleinde kamada sosiedade hotu presiza promove atividade limpeza jerál iha kada bairru no fatin públiku sira hotu.

Nia mós husu parte ezekutivu liuhosi entidade relevante atu aplika koima ba ema ne’ebé soe lixu arbiru, hadi’a jestaun lixu no sujere liuliu oinsá estabelese lixeiru iha fatin públiku, jardin, no fatin ka sítiu turistiku sira.

Nune’e mós, nia husu hadi’a mekanizmu jestaun lixu ba loza boot sira iha kapitál ne’ebé prodús lixu ho kuantidade boot, no kontinua implementa polítika zero plástiku inklui oinsá dezenvolve polítika resiklazen atu transforma lixu ba produtu seluk.

Grupu Defeza Ambientál nu’udar grupu voluntáriu ne’ebé harii ka eziste dezde iha tinan 20218 to’o agora no daudaun ne’e iha membru hamutuk ema na’in-30-resin hosi joven timoroan sira.

Grupu ne’e hari ho objetivu ida atu fanu ema hotu atu foti asaun kuidadu ambiente, tanba realidade lixu sai nafatin problema ka preokupasaun ohin loron iha Dili. Grupu ne’e deside tau naran Defeza Ambiente ne’e atu proteje ambiente liuliu iha territóriu Timor-Leste.

“Razaun motiva hari grupu ne’e tanba ita hatene katak, Dili ne’e kapitál no iha tempu  portugés (ukun koloniál) nia tempu babain ema hanaran Dili ne’e aikasi funan buras halo Dili matak, entaun mai fila-fali agora saida mak ita hasoru ne’e realidade Dili nia bonita la hanesan uluk ona. Entaun, ho hanoin sira hanesan ne’e ita tenke foti asaun, entaun ami hari Grupu ida Defeza Ambientál,” nia dehan.

Atividade ne’ebé durante ne’e Grupu Defeza Ambientál  hala’o mak hanesan kuda ai-oan iha área protezida sira hodi hamatak ambiente, halo desiminasaun informasaun kona-ba importánsia ambientál no mudansa klimátika ba estudante sira iha eskola balun iha Dili no munisípiu, no hala’o limpeza rekolla lixu iha fatin turistiku no fatin públiku iha kapitál Dili.

Notísia Relevante: Membru PN husu fó sansaun todan ba sidadaun soe lixu arbiru

Jornalista : Nelson de Sousa

Editór        : Cancio Ximenes

iklan
iklan

Leave a Reply

iklan
error: Content is protected !!