DILI, 01 marsu 2024 (TATOLI)—Sekretaria Estadu Igualdade (SEI) ba oin sei halo esforsu ho parte hotu hodi minimiza kazu soe bebé iha sosiedade nia le’et.
“Ha’u hanoin ba oin SEI nafatin halo nia papél advokasia iha kazu soe bebé ne’e, maibé atu hateten sé de’it mak komete krime ne’e, hanoin presiza hatán perante justisa, tanba ita hotu lei nia okos, maibé parte SEI sei nafatin halo esforsu maka’as atubele minimiza kazu ne’e,” governante ne’e dehan iha salaun Autoridade Munisípiu Dili, hafoin partisipa serimónia tomada pose ba Prezidente Autoridade Munisípiu Dili, sesta ne’e.
Notísia relevante : PNTL asegura ona autór ne’ebé soe bebé iha SMP2 Maliana
Maski nune’e, nia sente la justu bainhira akontese kazu ne’e tanba dalabarak públiku julga de’it ba feto.
“Hanoin la justu públiku julga de’it feto, katak feto mak estraga no soe bebé, maibé parte rua (feto no mane) tenke responsabiliza hotu,” nia akresenta.
Sekretária Estadu husu parte hotu nia kontribuisaun no husu atu uza konsiénsia nune’e bele hakribi ba aktu soe bebé.
“Nafatin apela ba ema hotu bainhira deskobre iha maluk feto hetan gravida, tenke fó korrajen tanba dalabarak sira hili desizaun soe bebé tanba la hetan suporta ruma hosi família, kolega no seluk tan,” nia tenik.
Organizasaun Naun Governamental (ONG), Aliansa Nasionál Luta Kontra Krime Infantisídiu Timor-Leste (ANCI-TL, sigla portugés) rejista kazu soe bebé hamutuk 58, durante tinan 2015 to’o 2023.
Númeru ne’e hosi munisípiu lima hanesan Dili, Baucau, Manufahi, Ainaro, Liquiçá no Viqueque hamutuk 49 iha tinan 2015 to’o 2020 no hosi munisípiu hanesan Dili, Baucau no Ainaro hamutuk sia iha tinan 2021 to’o 2023.
Jornalista : Arminda Fonseca
Editora : Julia Chatarina
