Governu fasilita ona subsídiu oinoin ba veteranu sira

DILI, 03 marsu 2024 (TATOLI)– Veteranu Marcelino da Cunha ‘Teki’ husi Munisípiu Lautém nota katak, durante ne’e governu fasilita ona subsidiu oinoin ba veteranu sira hanesan; pensaun no bolsa estudu ba veteranu sira-nia oan.

Maibé nia seidauk hetan uma, uma ne’e ba sira ne’ebé frente armada ho grau 20 a 24 de’it. Maibé ba frente klandestina la hetan uma.

“Subsídiu iha oinoin ne’ebé Governu no Estadu ne’e atribui ona mai ami (veteranu) mak haree hosi grau 0 a 3 to’o 20 a 24 nian, ho nia montante ne’ebé la hanesan tuir grau no dedikasaun ne’ebé durante iha funu laran, inklui subsídiu ba veteranu nia oan no atribui $40.000 hodi halo uma,” nia dehan ba Agência Tatoli hafoin partisipa komemorasaun loron veteranu ba dala VII (03/03/2017-03/03/2024), ho tema “Juntos marchemos para o futuro” iha resintu Palásiu Governu, domingu ne’e.

“Ha’u la hetan uma, uma ne’e ba sira ne’ebé frente armada ho grau 20 a 24 de’it. Ami frente klandestina la hetan uma, ha’u la hatene sira seluk. To’o ami-nia kolega balun hela iha kós. Maibé atu dehan tuir loloos ne’e frente tolu, armada, klandestina no diplomátika, hotu-hotu iha nia importánsia tanba hosi tolu ne’e mak dudu inimigu sai hosi Timor-Leste.”

Maibé, nia dehan ida-ne’e kapasidade finanseiru Estadu nian no hein de’it aban bainrua la’o oinsá.

Nia hateten, estadu ho governu hahú ona tau atensaun no prióridade ba kontribuisaun veteranu nian dezde tinan hirak ba kotuk maibé ida-ne’e mós tenke tuir kbiit ne’ebé estadu iha.

Entretantu, Veteranu Agapito da Conceição Rosa, hosi Munisípiu Dili hatete, veteranu barak hetan ona subsídiu no iha balun ne’ebé seidauk hetan, mak sira ne’ebé pendente iha 2003 no 2005 inklui verifikasaun dadus veteranu rejistadu 2009 nian ne’ebé daudaun iha prosesu validasaun.

“Ha’u pesoál ne’e hetan subsídiu veteranu ho grau 8 a 14 nian maibé kona-ba apoiu uma seidauk hetan. Ida ne’e filafali Governu tanba sira iha kompeténsia. Agora ba subsídiu ne’ebé ha’u simu ona ne’e sufisiente ona mai ha’u, maibé ha’u hakarak husu ba governu atu atensaun ba veteranu ne’ebé seidauk hatene subsídiu,” nia haktuir.

Governu atribui ona rihun $40 ba veteranu grau 20 a 24 ne’ebé besik atus ida (100) no atribui tan ona ba veteranu ho grau 15 a 19 nian. Hosi atribuisaun orsamentu, maiória mak hotu ona no entrega ona ba nain no balun iha faze konstrusaun, no seluk labele halo uma tanba uma iha hela.

Totál veteranu tantu frente armada, klandestina no diplomata iha Timor-Leste hamutuk 27.629. Hosi ne’e maiória hetan ona subsídiu oinoin hosi Governu.

Subsídiu fulan-fulan nian bazea ba grau, atribui osan ba konstrusaun uma no mós subsídiu ba veteranu nia oan hodi asesu ba eskola, hahú ensinu báziku to’o universidade, iha rai laran no diáspora.

Notísia relevante: Veteranu sira tenke unidade hodi kontribui bá dezenvolvimentu nasionál

Presiza envolve komunidade

Veteranu Marcelino da Cunha “Teki”, sente triste tanba komemorasaun loron veteranu ba dala VII (03/03/2017-03/03/2024), la envolve komunidade.

“Ami hanesan sobrevivente kontente no triste hotu dala-ida, tanba ema barak la partisipa komemorasaun ne’e, tanba jerasaun foun mak tenke hatene prezerva istória ne’e. Triste uituan tanba la envolve komunidade, ami sei moris hanesan ne’e, sá tan ami laiha. La’ós tanba ami ida, rua sei moris ne’ebé sei komemora, bainhira ita la envolve komunidade no joven sira entaun, oinsá mak sira bele hatene istória funu nian” Teki hateten.

Tanba ne’e nia rekomenda ba futuru tenke envolve komunidade liuliu joven no estudante sira tanba sira mak futuru ba rai ida-ne’e hodi hatutan istória.

“Futuru tenke envolve mós komunidade liliu joven tanba sira mak sei hatutan ita-nia istória iha prosesu libertasaun nian, agora buat-ne’ebé ita haree iha loron komemorasaun veteranu ne’e laiha komunidade ida no estudante sira. Ha’u sente triste tanba istória ne’e la’ós ami ida veteranu ho veteranu mak hatutan no prezerva istória maibé joven sira,” Teki rekomenda.

Tanba tuir nia, la’ós komunidade de’it maibé veteranu barak mak la partisipa. Ida-ne’e triste boot ida no keta estrutura la koñese ema.

“Ha’u haree kolega barak mak sei moris mas ha’u la hatene estrutura foun ne’e koñese ema sira-ne’e ka lae, ha’u la hatene ha’u hetan konvite mak mai ne’e, tanba lubuk ida mate ona mas barak sei moris. Maibé la prezensa mak barak. Esensiál liu konvida sira, sira-nia oan, be-ioan, ema-ne’ebé mai ne’e tenke hatutan ba istória nune’e labele lakon,” nia hatutan.

Jornalista: Osória Marques

Editór Evaristo Soares Martins