DILI, 04 marsu 2024 (TATOLI)—Sekretariadu Tékniku Administrasaun Eleitorál (STAE) hamutuk ho Ministériu Administrasaun Estatál (MAE) liuhosi Diresaun Jerál Desentralizasaun Governu Lokál, segunda ne’e, halo hela prepasaun no koordenasaun ba eleisaun suku 10, ne’ebé tuir planu sei realiza iha fulan-abril nia rohan iha tinan ne’e.
“Data fiksu Governu maka sei deside dekretu-lei ruma,” Diretór Jerál STAE, Elviro Fernandes Moniz, informa ba Agência Tatoli, iha ninia knaar fatin, STAE, Caicoli.
STAE no MAE daudaun halo mós preparasaun seluk hanesan levantamentu dadus iha sentru votasaun sira iha suku 10 ho nia aldeia sira.
“Ita-nia ekipa atu haree sentru votasaun sira asesu estrada, kondisaun eletrisidade no fatin oinsá iha eskola, ka sede aldeia, sede suku ka sentru komunitáriu ita presiza haree nune’e karik sira ne’e laiha presiza harii tenda, ida-ne’e akipa sei halo hela levantamentu dadus,” nia akresenta.
Notísia relevante : Rezultadu Eleisaun Suku volta daruak iha Molop empata
Órgaun eleitorál rua ne’e liuhosi Diresaun Jerál Dezentralizasaun Governu Lokál halo hela preparasaun ba nesesidade lojístika hanesan kuantidade transporte ne’ebé sei uza iha momentu eleisaun, orsamentu, kombustível no seluk tan.
“Parte tékniku ita planu no hein Governu bainhira mak dekreta fiksa data eleisaun nian mak ita hahú halo rekrutamentu ofisiál eleitorál hamutuk 252 iha prosesu eleisaun to’o ramata,” nia akresenta.
Orsamentu ne’ebé prevee ba eleisaun tinan ne’e, provizóriamente $182.709,50.
Eleisaun suku tinan ba suku 10, ho ninia aldeia 53, kompostu hosi munisípiu Dili postu administrativu Cristo Rei suku Ailoc ho ninia aldeia lima, postu administrativu Don Aleixo Benonuk, Madohi no Manleuana ho ninia aldeia hamutuk 28, postu administrativu Metinaro suku Manteloão ho ninia aldeia neen.
Munisípiu Aileu postu administrativu Laulara suku Bocolelo aldeia hamutuk haat, postu administrativu Aileu suku Lequitura aldeia haat, munisípiu Manatuto postu administrativu Lacló suku Laicore, aldeia haat, suku Uma-Caduac aldeia ida, no postu administrativu Barique, suku Sikone-Diloli, aldeia hamutuk rua no munisípiu Viqueque postu administrativu Ossu, suku Builo aldeia haat.
“Hosi suku 10 no aldeia 53 ne’e, tuir dadus provizóriu eleitór ne’ebé sei partisipa iha votasaun ne’e hamutuk 26.992,” Elviro hateten.
Jornalista : Arminda Fonseca
Editora : Julia Chatarina
