DILI, 05 marsu 2024 (TATOLI)–Prezidente Juri Bolsa Rekrutamentu ka Kandidatu ba Profesór, Anita Tavares de Jesus, hateten aplikante bolsa rekrutamentu ka bolsa kandidatu ba profesór ne’e sei hala’o teste eskrita iha 15-16 marsu 2024.
Notísia Relevante: PM Xanana husu profesór ne’ebé kontratu ramata bele konkorre bolsa rekrutamentu
“Ne’eduni kandidatu ida-idak atu haree sira-nia kalendáriu ne’e,” Prezidente juri ne’e hateten ba Agência Tatoli iha nia kna’ar fatin, Vila Verde, tersa ne’e.
Teste ida-ne’e, nia dehan, Ministériu Edukasaun (ME) servisu hamutuk ho Komisaun Funsaun Públika (KFP), hodi uza sala teste nian no prosesu ne’e sei la’o ho eletrónika.
Bainhira prosesu la’o ho eletrónika mak nia rezultadu teste sai kedas no ema ida-idak bele haree kedas nia rezultadu iha dashboard.
“Kandidatu hotu-hotu ne’ebé admitidu ne’e ba teste sei teste iha KFP tanba ita koordena ho KFP hodi utiliza ekipamentu hanesan komputadór iha 200 no sala de teste nian. Hosi ne’e teste kandidatu ita fahe ba turnu haat ho totál kandidatu 640 no kada turnu iha 160,” nia dehan.
Atuál Diretora Nasionál Rekurus Umanu, ME hateten, teste loron ida-nian iha turnu haat no sabádu mós uza ba teste tanba paskua iha feriadu barak no loron Idul Fitri, entaun atu aselera teste ne’e tenke uza mós sábadu.
Prosesu verifikasaun ba kandidatu profesór nian ne’e finaliza ona iha loron 01 marsu, ho lista admitidu hamutuk 13.021 ne’ebé kompostu hosi feto 7.924 no mane 5.097 no la admitidu hamutuk 1.131 ne’ebé kompostu hosi feto iha 678 no mane 453.
“Ida-ne’e ita taka sai ona iha 01 marsu kompleta ho nia kalendáriu kona-ba teste eskrita eletróniku sira iha munisípiu sira hotu. Ne’e ba sira-ne’ebé tama iha lista admitidu. Iha ne’ebá la taka sai por munisípiu maibé taka sai por referénsia ka grupu rekrutamentu. Ezemplu ita taka iha ne’ebá BK01-BK09,” nia hateten.
Diretora dehan BK01 mak edukasaun pre-eskolár ne’e kandidatu hamutuk 148, BK03 mak ensinu báziku ba primeiru no segundu siklu ne’e iha 228, depois tuir mai língua tetún, portugés, matemátika, siénsia naturál, istória no jeografia inklui dezenvolvimentu pesoál.
Tanba ne’e, Prezidente Juri ne’e husu kandidatu admitidu hotu-hotu tenke haree didi’ak kalendáriu ne’ebé mak taka sai ona lista iha territóriu, nune’e presiza haree naran ho di’ak, loron, oras teste nian, turnu hira., nune’e bainhira mai teste labele halo konfuzaun.
Iha teste ne’e, kandidatu sira sei lori karta aplikante hodi bainhira rejistu ne’e, karik presiza mós kartaun eleitorál.
Notísia Relevante: Aplikante 8.601 konkorre bolsa rekrutamentu ba profesór
Jornalista : Osória Marques
Editór : Cancio Ximenes
