Korreiu Dili rekolla reseita rihun $27 resin iha tinan 2023
DILI, 06 marsu 2024 (TATOLI)—Korreiu Dili rekolla reseita interna $27.552,49 ba kofre Estadu hosi atividade balkaun Korreiu Dili, iha tinan 2023 nia laran.
“Reseita sira ne’e mai hosi selos, fotokopia, enkomenda, karta rejistradu, out/prdts, kaixa postál, envelope, embalajen no seluk tan hanesan aluga salaun korreiu,” Diretora Korreiu Dili, Juliana Ximenes, informa ba Agência Tatoli, iha ninia knaar fatin, Quintál Ki’ik, kuarta ne’e.
Notísia relevante : ANATL, E.P rekolla reseita millaun $2,4 durante tinan 2023
Reseita iha trimestre dahuluk $12.557,39, trimestre daruak $5.806,95 no trimestre datoluk $5.026,75 no trimestre dahaat $3.961,40.
Reseita ne’ebé tama iha enkomeda ne’e mak dalabarak família traballadór sira haruka sasán sira hanesan roupa, tais Timor, inklui dokumentu renovasaun sira ba Koreia Súl, Austrália no seluk tan.
“Sasán ne’ebé haruka ba rai-li’ur ne’e ita tau kada kilograma folin la hanesan, ba nasaun Sudeste Aziátiku kilograma ida $40, ba nasaun Europeira kilograma ida $60, no ba nasaun Estadu Unidu Amérika $120,” nia informa.
Korreiu Dili ne’ebé tutela ba Diresaun Nasionál Servisu Portál hosi Ministériu Transporte no Komunikasaun (MTK) hetan alokasaun orsamentu rihun $415 ba tinan ne’e.
Jornalista : Arminda Fonseca
Editora : Julia Chatarina
