DILI, 06 marsu 2024 (TATOLI)–Primeiru-Ministru (PM), Kay Rala Xanana Gusmão hala’o enkontru ho Artista timor-oan, Maria Madeira ho ekipa, hodi haree aprezentasaun espozisaun arte konteporánea tais Timor no filme dokumentáriu kona-ba feto Timor-Leste, ne’ebé sei aprezenta iha Espoziasaun Internasionál Biennale de Venice-Itália ne’ebé selebra ba dala-60.
Enkontru ne’e hala’o iha loron tersa (05/03), iha Otél Lanhham, Melbourne-Austrália, ne’ebé partisipa mós hosi Sekretáriu Estadu Arte no Kultura (SEAK), Jorge Soares Cristóvão.
“Ha’u apoia nafatin imi-nia preparasaun hotu atu hala’o ho susesu koordena nafatin ho Sekretáriu Estadu Arte no Kultura,” PM Xanana hato’o liuhosi nota ne’ebé Agência Tatoli asesu, kuarta ne’e.
Espozisaun ne’e rasik sei hala’o durante fulan-hitu, hahú hosi fulan-abríl to’o novembru 2024, ne’ebé sei partisipa hosi nasaun 90, ne’ebé Timor-Leste hahú hala’o ona preparasaun másimu atu promove ninia obra arte konteporánea oin-oin.
Iha biban hanesan, Sekretáriu Estadu Arte no Kultura, Jorge Soares Cristóvão, informa katak aprezentasaun ne’e hodi fó informasaun detallu ba Xefe Governu inklui membru Governu sira.
Notísia relevante : APFTL-Oxfam sei realiza espozisaun agrikultura “Joven Ba Mudansa”
Iha espozisaun ne’e, Timor-Leste sei aprezenta projetu istória feto Timor-Leste ne’ebé prepara hosi Artista, Maria Madeira ho tema ‘Kiss and Don’t Tell’ (Rei, Mais Labele Ko’alia), ne’ebé apoia hosi Kuradora, Natalie King ho ekipa produtór filme hosi Austrália, Artista timor-oan, Alfeu Pereira no Pintór sira hosi Grupu Arte Moris.
“Enkontru ne’e ami introdús ba Primeiru-Ministru no membru Governu sira kona-ba Timor-Leste nia partisipasaun iha iha Espoziasaun Internasionál iha Biennale de Venice-Italia ba dala-60. Primeiru-Ministru Xanana sei halo abertura pavilliaun iha loron 19 abríl 2024. Ohin ita aprezenta mós filmeker Maria Madeira ninian, ne’ebé sei lori ba hatudu iha Expozisaun,” Jorge Soares subliña.
Antes ne’e, iha loron 31 janeiru liubá, Sekretáriu Estadu Jorge Soares hamutuk ho Maria Madeira, ekipa Fundasaun Oriente, Embaixada Austrália, Portugal, Fransa lansa ona Gallery Maria Madeira ho tema ‘Ko’alia Funan-Funan’ nu’udar espozisaun foun ne’ebé reprezenta Timor-Leste hodi kompete hamutuk ho nasaun seluk ne’ebé promove mós espozisaun arte konteporánea sira famozu liu iha mundu.
Nune’e mós Artista timor-oan, Maria Madeira sente orgullu tebes bele aprezenta preparasaun ba PM Xanana no membru Governu tutela ba arte no kultura, hodi fó apoia másimu ba sira-nia preparasaun.
Maria Madeira esplika, tema filme ‘Kiss and Don’t Tell’ foka liu kona-ba rezisténsia istória feto Timor-Leste iha luta.
“Filme Kiss and Don’t Tell ko’alia kona-ba istória rezisténsia feto nian ba vitória independénsia Timor-Leste. Aban, ami hahú halo filme no sei lansa ofisiál iha iha Biennale de Venice-Itália,” Maria dehan.
Enkontru ne’e akompaña mós hosi, Vise Primeiru-Ministru no Ministru Koordenadór Asuntu Ekonómia no Ministru Turizmu no Ambiente, Francisco Kalbuadi Lay, Ministru Negósiu Estranjeiru no Kooperasaun, Bendito dos Santos, Vise-0Ministra Asuntu ASEAN, Milena Maria da Costa Rangel, no Embaixadora Timor-Leste iha Camberra-Austrália, Inês Almeida.
Jornalista : Antónia Gusmão
Editora : Julia Chatarina
