OÉ-CUSSE, 06 marsu 2024 (TATOLI) – Koordenadór Ezekutivu, Zona Espesiál Ekonomia Dezenvolvimentu Oé-Cusse Ambeno (ZEEDOA), fó sai, iha semana ne’e, ekipa tékniku hahú rekolla dadus hosi komunidade sub-rejiaun Pássabe, Rejiaun Administrativa Espesiál Oé-Cusse Ambeno (RAEOA) hodi prepara relatóriu Estadu Rejiaun kona-bá estabelesimentu Zona Ekonomia Espesiál Sosiál Merkadu Timor-Leste (ZEESM-TL) nian.
“Horisehik ami halo ona enkontru ho tékniku profisionál hotu, atu lidera ekipa ida komesa hahú halo ona levantamentu dadus no hahú uluk hosi Pássabe, hodi rekolla dadus informasaun hotu, ne’ebé sira presiza atu halo avaliasaun peskiza, nune’e prepara relatóriu Estadu Rejiaun nian,” João Mendes Gonçavéz, ko’alia iha sub-rejiaun Oésilo, kuarta ne’e.
Notísia relevante: João Gonçalves sei submete relatóriu estabelesimentu ZEESM bá Konsellu Ministru
João Gonçalves, informa ekipa ne’ebé sei tún iha baze, peskiza ba área hotu, tanba atu halo relatóriu Estadu Rejiaun, la’ós ba área ekonomia de’it, maibé akumula mós produtividade sira hanesan agrikultura, turizmu, indústria, inklui problema sosiál, ba asuntu edukasaun no saúde.
Nia hatutan, la’ós ne’e de’it maibé sei haree mós área temátika hanesan jéneru no rekursu umanu nian, tanba planu konvida investidór barak, hakarak investe iha Oé-Cusse, tenke halo avaliasaun nesesidade saida mak presiza, atu prepara ema servisu iha agrikultura no turizmu nian.
“Entaun avaliasaun sira-ne’e ita tenke halo didia’k atu hato’o ba planu dezenvolvimentu futuru nian, ita tenke hato’o planu ho di’ak no kompreensidu no bele responde nesesidade RAEOA nian,” nia katak.
Nune’e, bainhira rekolla ona dadus no konklui relatóriu, sei kontinua diskute ba preparasaun planu dezenvolvimentu saida mak atu hela iha futuru mai, nune’e bele prepara nia orsamentu.
“Kuandu ida-ne’e remata ona, ami sei lori ba Konsellu Ministru, aprova iha ne’ebá ho enkuadramentu legál, ne’ebé ami sei prepara, atu harii fali entidade jurídika foun, sei lidera ZEEDOA aban bainrua iha Oé-Cusse, nune’e programa dezenvolvimentu ne’e komesa la’o tán ba oin,” nia informa.
Tuir nia observasaun, durante tinan barak, dezenvolvimentu infraestrutura sira iha Oé-Cusse, konsentra liu iha Pante Makasar, maske Governu Sentrál aloka osan ho montante boot maibé kondisaun real iha nível postu no suku seidauk iha mudansa.
“Tan ne’e maka ami mai iha-ne’e atu halo mudansa ba situasaun ne’e, tanba povu barak iha foho sei kiak, ida-ne’e maka ami sei buka atu serbí ba povu Oé-Cusse tomak, la’òs serbí de’it Pante Makasar, maibé sub-rejiaun hotu-hotu, tenke tau atensaun hanesan,” nia promete.
Notísia relevante: PM Xanana husu Atoni-oan hamutuk ho Autoridade foun dezenvolve ekonomia sosiál iha Oé-Cusse
Entretantu, João Mendes Gonçalves, hetan nomeasaun hosi IX Governu Konstitusionál lideradu Primeiru Ministru Kay Rala Xanana Gusmão, no simu ona pose nu’udar koordenadór ZEESM, no dezigna Régio da Cruz Salu no Hercolano de Sousa hanesan Vise-Koordenadór.
Jornalista: Abílio Elo Nini
Editór: Evaristo Soares Martins
