iklan

NASIONÁL, EKONOMIA, HEADLINE

ANP no HTS selebra kontratu fahe produsaun área rai-maran iha Viqueque

ANP no HTS selebra kontratu fahe produsaun área rai-maran iha Viqueque

Prezidente ANP, Gualdino do Carmo da Silva no Diretora Ezekutiva empreza HTS Exploration Ltd, Aizhan Ismailova, selebra akordu kontratu fahe produsaun ba bloku F iha rai-maran, lokaliza iha munisípiu Viqueque, ne’ebé asiste hosi Primeiru-Ministru interinu, Mariano Assanami Sabino no entidade relevante seluk, iha salaun Multiuso GMN Bebora, kinta (07/03/2024). Imajen Tatoli/António Daciparu

DILI, 07 marsu 2024 (TATOLI)–Governu liuhosi Autoridade Nasionál Petróleu (ANP) no empreza hosi Kazakistaun, HTS Exploration Ltd, selebra akordu kontratu fahe produsaun hanaran KFP TL-OT-22-22 ba bloku F iha rai-maran, ne’ebé lokaliza iha munisípiu Viqueque.

Akordu ne’e asina hosi Prezidente ANP, Gualdino do Carmo da Silva no Diretora Ezekutiva empreza HTS Exploration Ltd, Aizhan Ismailova, ho sasin hosi Primeiru-Ministru (PM) interinu, Mariano Assanami Sabino, Ministru Petróleu no Rekursu Minerál, Francisco Monteiro, membru Parlamentu Nasionál, reprezentante veteranu, Reprezentante FALINTIL-Forsa Defeza Timor-Leste (F-FDTL), Polísia Nasionál Timor-Leste (PNTL), no entidade sira hosi empreza HTS Exploration.

Primeiru-Ministru interinu, Mariano Assanami, konsidera empreza HTS maski mai hosi rai dook tebes, maibé iha kompromisu boot hakarak investe iha Timor-Leste, ne’ebé ho asinatura kontratu ne’e marka pasu importante ida ba povu tomak, liu-liu povu munisípiu Viqueque.

Notísia relevante :ANPM-Timor Gap asina kontratu fahe produsaun ba esplorasaun posu “Rara-hana” iha Lautem

“Husu ba povu Viqueque tantu joven, inan-aman no veteranu sira hotu atu fó apoia tomak ba serbisu ne’ebé halo. Governu liuhosi Ministériu Petróleu no Rekursu Minerál apoia tomak ba atividade petrolífera tanba setór ne’e importante ba dezenvolvimentu ekonomia rai-laran,” Atuál Vise PM Asuntu Sosiál, hato’o iha ámbitu asinatura kontratu fahe produsaun, iha salaun Multiuso GMN Bebora, kinta ne’e.

Esplorasaun kobre suku 26 iha viqueque

Iha fatin hanesan, Prezidente ANP, Gualdino do Carmo da Silva, relata, HTS hanesan empreza ba esplorasaun no produsaun mina-rai no gás ne’ebé sai na’in ba kampu mina-rai no gás balun iha Kazakistaun inklui fornese serbisu esplorasaun no produsaun iha rejiaun ne’e.

“Asinatura kontratu fahe produsaun ba kooperasaun petrolífera liuhosi hahú ho estudu ka peskiza iha área rai-maran iha bloku F iha área Viqueque, ne’ebé ninia luan kilómetru kuadradu 884,45, kobre suku 26 hosi postu administrativu haat hanesan Ossu, Uatolari, Uatucarbau no Viqueque rasik,” Gualdino do Carmo, tenik.

Kontratu fahe produsaun preve partisipasaun Estadu iha operasaun petrolífera liuhosi empreza estatál Timor GAP E.P, ne’ebé ninia partisipasaun bele hahú hosi faze esplorasaun ka iha faze dezenvolvimentu, ne’ebé haktuir ba termu kontratu fahe produsaun no artigu 22 hosi Lei Atividade Petrolíferu.

Liuhosi promosaun lisensiamentu segunda ronda 2019/2022, HTS hatudu interese hatama proposta ba bloku F. Hafoin liuhosi konkursu ne’ebé kompetitivu no avaliasaun internál hosi ANP, HTS sai hanesan manán-nain ba bloku F, ne’ebé loke dalan ba negosiasaun ba termu no kondisaun sira hosi Kontratu fahe produsaun ne’ebé asina ona.

“Ho susesu boot ida-ne’e hatudu katak Governu Timor-Leste liuhosi Ministeriu Petróleu no Rekursu Minerál ne’ebé reprezenta hosi ANP iha relasaun di’ak ho HTS atu dezenvolve indústria petróleu iha Timor-Leste. Ami hato’o dezeju susesu tomak ba empreza iha nia primeiru períodu esplorasaun nian,” nia salienta.

Antes ne’e, Governu liuhosi Autoridade Nasionál Petróleu no Minerál (atuál ANP) loke konkursu públiku ba bloku hamutuk 18 iha área rai-maran hitu no tasi-laran sia, ho finalidade empreza lima mak hatudu sira-nia interrese hodi halo esplorasaun.

Hosi ne’e, Governu asina ona kontratu ho empreza tolu, iha tinan 2022 ho Timor GAP bloku A iha munisípiu Laútem, tinan 2023 ho empreza ENI Timor-Leste hosi Itália bloku P área tasi-laran, tinan 2024 ho HTS Exploration hosi Kazakhistan bloku F iha área rai-maran iha Viqueque. Enkuantu hela bloku rua mak seidauk selebra asinatura Kontratu fahe produsaun hanesan ho kompañia Santos ba bloku R área tasi-laran, no empreza ETO Timor bloku B rai-maran lokaliza iha Baucau.

Diretora Ezekutiva empreza HTS Exploration Ltd, Aizhan Ismailova, hateten, empreza iha kompromisu atu ezekuta nia obrigasaun sira tuir Kontratu fahe produsaun ba kompromisu sira iha esplorasaun no konteúdu lokál tuir termu estabelesidu.

“Ami iha kompromisu atu estabelese rezidénsia iha fulan balun nia laran tan hafoin hahú ami-nia kontratu fahe produsaun ba kompromisu tinan-tolu nian. Ami espera bele iha rezultadu hosi bloku ida-ne’e hodi hasa’e kresimentu nasaun, ne’ebé ami iha interrese tebes atu partisipa iha dezenvolvimentu nasaun,” nia kompromete.

Esplorasaun fahe iha faze tolu

Programa serbisu esplorasaun mínimu ka períodu dahuluk esplorasaun iha faze tolu mak hanesan, iha tinan dahuluk sei re-entry fali posu sira ne’ebé eziste ona iha área kontratu, hala’o perfilmajein ba posu revestidu, no integridade ba posu, análiza no avalia dadus jeolójiku no jeofísiku.

Iha tinan daruak, halo akizisaun 3D sísmiku ka 3D perfis sísmiku vertikal (Vertical seismic profiling) metru 3325, kilómetru 100, liña dadus 2D sísmiku ho prosesamentu sísmiku, teste ba posu (well testing), peskiza asidifikasaun, no análiza kímika fluidu.

Tinan datoluk mak kompromisiu perfurasaun ba posu esplorasaun rua ne’ebé sei hala’o liuhosi sidetrack ida no posu foun ida, ka sidetrack rua, ka posu foun rua sekarik sidetracking téknikamente la viável, ho kle’an mínimu metru 2000 true vertical depth (TVD) ba posu foun ka metru 2000 measured depth (MD) ba posu sidetrack.

Nune’e mós, Prezidente Autoridade Viqueque, Januário Soares, kompromete katak povu Viqueque prontu atu koopera ho empreza durante serbisu ne’e la’o iha terrenu.

“Ha’u kongratula Governu sentrál nia serbisu ne’ebé kontinua buka riku-soin iha ita-nia rain, ami kontente tanba kontratu ne’ebé asina daudaun iha área Viqueque mós hola parte. Hanesan Autoridade lokál ami prontu asegura katak prosesu estudu esplorasaun bele la’o ho susesu,” nia komprometidu.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!