OÉ-CUSSE, 08 marsu 2024 (TATOLI) – Empreza One Universál Reason (OUR Ltd), hosi nasaun Repúblika Populár Xina, hakarak halo investimentu ba setór turizmu no ospitalidade iha Rejiaun Administrativa Espesiál Oé-Cusse Ambeno (RAEOA).
Notísia relevante: Rogério Lobato sei husu opiniaun Igreja Katólika bá turizmu kulturál Nunuheno
Tanba ne’e, iha sesta ne’e, Jestór Empreza OUR Ltd, Jonathan Hiu, hasoru Prezidente Autoridade RAEOA, Rogério Tiago Lobato, hodi aprezenta planu investimentu ba futuru implementasaun.
“Ha’u kontente ohin, hasoru Prezidente Autoridade, simu ami, atu hato’o ami-nia planu investimentu, tanba Oé-Cusse iha poténsia barak liuliu fatin turizmu iha tasi-ibun sira kompleta ho fasilidade seluk hanesan otél no seluk-tán,” nia katak.
Prezidente Autoridade RAEOA, Rogério Tiago Lobato, konsidera asuntu investimentu importante, nune’e nia prontu simu sidadaun hotu, importante liuhosi koordenasaun.
“Sira hakarak mai investe iha Oé-Cusse ita prontu simu, hanesan Prezidente Autoridade ha’u sei fó apoia tomak loke odamatan ba sira, atu kuda sira-nia osan iha-ne’e tanba sei kontribui redús dezempregu,” nia promete.
Nia fundamenta, durante iha diskusaun aprezentasaun, empreza OUR Ltd, interese liu atu investe iha indústria ospitalidade, otél no turizmu tanba sira iha koneksaun ona no investidór balu hosi nasaun viziñu.
“Entaun ida-ne’e oportunidade di’ak tebes, ita tenke loke odamatan ba sira, importante mak ne’e ema mai atu investe iha-ne’e ita tenke simu sira ho di’ak, ita tenke kria kondisaun atu sira iha-ne’e labele hein kleur, lakon pasiénsia ba investe fali iha fatin seluk,” nia katak.
Notísia relevante: Rogério Lobato sei serbisu maka’as ba dezenvolvimentu Oé-Cusse
Jornalista: Abílio Elo Nini
Editór: Evaristo Soares Martins
