MESSK sei avalia UNPAZ no DIT loke klase paralela iha Oé-Cusse
OÉ-CUSSE, 08 marsu 2024 (TATOLI) – Ministériu Ensinu Superiór, Siénsia no Kultura (MESSK), sei halo avaliasaun bá Universidade da Paz (UNPAZ) no Dili Institutu ba Teknolojia (DIT, sigla inglés) ne’ebé loke ona klase paralela iha Rejiaun Administrativa Espesiál Oé-Cusse Ambeno (RAEOA).
Tan ne’e, molok avalia, Ministériu Ensinu Superiór Siénsia no Kultura José Honorio da Costa Gerónimo, sesta ne’e hala’o enkontru koordenasaun ho Prezidente Autoridade Rejiaun Administrativa Espesiál Oé-Cusse Ambeno (RAEOA), Rogério Tiago Lobato.
“Objetivu hosi enkontru ne’e atu introdús programa hosi ministériu nian relasaun klase paralela universidade sira iha Oé-Cusse, ita hatene UNPAZ ho DIT nia paradeiru iha Oé-Cusse, ha’u hanoin ministériu sei haree halo desizaun balun relasaun ho sira-nia klase paralelu ne’ebé la’o hela iha Oé-Cusse,” José Honorio da Costa Gerónimo, ba jornalista sira.
Notísia relevante:MESSK hapara atividade klase paralela UNPAZ Oé-cusse
Governante ne’e, fundamenta, universidade sira iha direitu atu loke klase paralela, maibé primeiru tenke kumpri, kurríkulu padraun nasionál ne’ebé define ona iha MESSK nian.
“Sira tenke iha profesór, sira mós tenke iha fatin, tenke iha kurríkulu ho oráriu ne’ebé loos, nune’e aprendizajen ne’e di’ak ba estudante sira,” nia katak.
Biban hanesan, Prezidente Autoridade RAEOA, Rogério Tiago Lobato, konfirma, Oé-Cusse nu’udar rai enklave presiza universidade nune’e bele fasilita Oé-Cusse oan sira buka matenek.
“Ami simu sira, maibé universidade sira atu hanorin iha-ne’e tenke tuir prosedimentu legál, hanesan UNPAZ, ha’u sei bolu sira mai, ko’alia oinsá halo kooperasaun di’ak, tanba iha Dili nian iha baze legál, agora mai iha Oé-Cusse tenke tuir regulamentu ba legalidade, importante mak ne’e loke universidade tenki tuir prosedimentu ne’ebé MESSK fó sai,” nia katak.
Notísia relevante: UNPAZ ameasa halo manifestasaun bainhira MESSK hapara klase paralela
Jornalista: Abílio Elo Nini
Editór: Evaristo Soares Martins
