OÉ-CUSSE, 09 marsu 2024 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), lideradu Rogério Tiago Lobato, sábadu ne’e, fó pose ba Lorêncio da Cunha, nu’udar jestór sub-rejiaun Pante Makasar bá mandatu tinan lima, hosi 2024 to’o 2028.
Notísia relevante: Ministru Tomás Cabral husu jestór foun Nítibe serbí povu ho responsabilidade
Prezidente Autoridade RAEOA, Rogério Tiago Lobato, husu jestór foun atu ukun ho domin no hakuak partidu hotu, hodi kontribui pás no estabilidade.
“Ha’u husu ba administradór postu foun, atu serbí ema hotu ho fuan no domin, ita-boot mai hosi CNRT, iha demokrasia partidu ne’ebé manán nia mak ukun, maibé ita-boot ukun la’ós hanesan administradór CNRT nian, maibé ukun hanesan funsionáriu Estadu nian, ukun ba ema hotu, ba partidu hotu, ukun ba ema-ne’ebé partidu laiha, ukun ba Oé-Cusse ona sira,” Rogério Lobato, fó hanoin iha ámbitu serimónia pose ne’e.
Eis Ministru Interiór ne’e, husu Konsellu Suku ualu iha pertense sub-rejiaun Pante Makasar, atu hamutuk hatudu ezemplu, hametin unidade, hodi kontribui ba prosesu dezenvolvimentu.
“Parte Makasar ne’e porta entrada, ita atu tama iha Oé-Cusse ne’e aeroportu, ita tama hosi Sakato pertense Pante Makasar, entaun ita tenke hatudu katak ema sira iha Pante Makasar ne’e unidu lalika haree partidu, tanba partidu ne’e ema idak-idak nia direitu, diferensa ideia la signifika, katak ita labele hamutuk, maibé ita tenke hamutuk,” nia fó hanoin.
Notísia relevante: Paulino Marques husu Autoridade RAEOA prioriza estrada iha Pássabe
Jestór nomeadu, Lorênco da Cunha, promete durante mandatu sei servisu hamutuk entidade hotu, Konsellu Suku, organizasaun sosiedade sivíl sira iha sub-rejiaun Pante Makasar.
“Agradese ba konfiansa ida-ne’e mai ha’u, atu lidera postu administrativu Pante Makasar, ne’e duni presiza servisu hamutuk ho komunidade tomak iha suku ualu, hanesan lideransa komunitáriu sira, autoridade lokál, no organizasaun hotu hodi hala’o dezenvolvimentu ho responsabilidade,” nia promete.
Jestór sesante, Eurico da Costa Bobo, promete sei koopera servisu hamutuk ho jestór foun, no agradese ba autoridade lokál sira durante ne’e apoia ona durante nia mandatu.
“Ha’u orgullu tebes tanba ita la seluk la leet, no ha’u hakarak agradese ba xefe suku na’in-ualu hamutuk ho estrutura tomak iha Pante Makasar, karik durante tinan tolu, ha’u-nia mandatu, keta ha’u-nia ibun naksalak ba imi, atan ha’u husu deskulpa,” nia orgullu.
Notísia relevante: Rogério Lobato husu komunidade apoia jestór foun dezenvolve sub-rejionál Oésilo
Bazea sensu populasaun 2022, iha sub-rejiaun Pante Makasar iha suku ualu hanesan; suku Nipani, Costa, Lifau, Taiboko, Cunha, Lalisuk, Bobokase no suku Taiboko ho totál populasaun 45.415.
Jornalista: Abílio Elo Nini
Editór: Evaristo Soares Martins
