Ministru Tomás Cabral husu jestór foun Nítibe serbí povu ho responsabilidade
OÉ-CUSSE, 07 marsu 2024 (TATOLI) – Ministru Administrasaun Estatál (MAE), Tomás do Rosário Cabral no Prezidente Autoridade Rejiaun Administrativa Espesiál Oé-Cusse Ambeno (RAEOA), Rogério Tiago Lobato, kinta ne’e fó pose ba Agustinho Afulit, nu’udar jestór foun iha sub-rejiaun Nítibe ba mandatu tinan tinan lima, hosi 2024 to’o 2028.
Notísia relevante: Rogério Lobato husu komunidade apoia jestór foun dezenvolve sub-rejionál Oésilo
Iha serimónia ne’e, Ministru Administrasaun Estatál, Tomás do Rosário Cabrál, husu atu serbí ba populasaun suku lima iha sub-rejiaun Nítibe, hatudu responsabilidade koopera ho entidade relevante sira, hametin unidade hodi haforsa servisu administrasaun Nítibe nian.
“Ita Estadu ida de’it, servisu ba povu apoia autoridade, ita-boot sira hakat liu tiha, dezafiu sira-ne’ebé akontese iha Nítibe, ita hatene maibé ne’e iha tempu pasadu, ita tau ba kotuk, agora foti oin la’o ba oin, nune’e Oé-Cusse bele la’o, sei imi hafuhu malu nafatin, imi trata malu hosi kotuk, ne’e sei la la’o,” Tomás Cabral, ko’alia iha ámbitu iha serimónia pose ne’e.
Governante ne’e, relembra hikas, bainhira Autoridade simu Pose, diskursu Primeiru Ministru, Kay Rala Xanana Gusmão, iha otél Ambeno, husu povu Oé-Cusse, atu hamutuk.
“Imi tenke sai ida de’it ba rai ida-ne’e, imi hela ketak maka imi hafuhu malu beibeik, imi sona malu, no kontra malu hosi kotuk, imi sei la la’o, tan ne’e bainhira iha problema iha situasaun sira-ne’e, bele informa direita ba Prezidenti Autoridade nune’e bele hetan solusaun ba problema ne’ebé imi hasoru,” Governante ne’e fó hanoin.
Notísia relevante:Estrada Noefefan-Nítibe hahú prosesu pavimentasaun asfáltika
Prezidente Autoridade RAEOA, Rogério Tiago Lobato, agradese dedikasaun tomak hosi jestór sesante, nia husu ba jestór foun presiza hamutuk, hodi mellora prestasaun servisu iha administrasaun Nítibe.
“Jestór foun, ohin simu pose, ita-boot nia belun oras ne’e sesante ona, maibé nia matenek servisu di’ak ba rai ida-ne’e, hanesan filozofia portugés ida dehan nune’e, ha’u hatene katak ha’u la hetene buat ida, ne’e katak ita-nia vida tomak ne’e tenke moris aprende, aprende hosi ema seluk nian, ne’e ita-boot administradór postu foun aprende ho sira-ne’ebé uluk ukun tiha ona, atu evita halo erru ne’ebé sira uluk halo,” nia katak.
Iha biban ne’e, Jestór nomeadu sub-rejiaun Nítibe, Agustinho Afuli, promete durante mandatu promove liña kooperasaun no akumula entidade hotu, atu hatutan servisu ne’ebé autoridade sesante husik hela.
“Ohin atan ha’u la’ós troka maibé atu kompleta oinsá ba futuru, atubele ita la’o hamutuk, nune’e ita-bele serbí di’ak liután ba ita-nia povu suku lima iha sub-rejiaun Nítibe, tan ne’e, ha’u la’ós oportunidade di’ak ba ha’u maibé ida-ne’e responsabilidade boot ba ha’u, no ba oin ha’u sei koopera nafatin ho entidade hotu, no promete sei kontinua servisu sira-ne’ebé halo ona antes,” nia promete.
Notísia relevante:Jestór Nítibe rekomenda pontu haat ba Autoridade RAEOA presiza konsidera
Jestór sesante, Teodork Sila, agradese ba fó konfiansa durante mandatu, espera ho prezensa jestór foun koopera ho Governu, kontinua tau matan ba investimetnu infraestrutura bázika, sira-ne’ebé Autoridade implementa ona iha Nítibe,
“Autoridade halo ona investimentu báziku, iha setór edukasaun, saúde, agrikultura, estrada, ponte, bee-moos no programa PNDS inklui edifísiu sub-rejiaun Nítibe, tan ne’e, ha’u rekomenda kontinua halo investimentu bázika tuir área prioridade sira-ne’e, tanba nesesáriu ba komunidade tomak iha sub-rejiaun Nítibe,” nia espera.
Notísia relevante: Foos ho kilograma 25 iha Nítibe: Antes $14,50, agora sa’e ba $20,50
Geografikamente, sub-rejiaun Nítibe, lokaliza iha parte norte fronteira direita ho distritu Kupang no distritu Timur Tenggah Utara (TTU), Repúblika Indonézia ho totál populasaun 15.898, hosi suku lima no aldeia 17, hanesan suku Ban-Afi, Suni-Ufe, Lela-Ufe, Bene-Ufe no suku Usitako.
Jornalista: Abílio Elo Nini
Editór: Evaristo Soares Martins
