BOBONARO, 11 marsu 2024 (TATOLI)-Estudante hosi Eskola Sekundária Jerál (ESG, sigla portugués) númeru I Dom Martinho da Costa Lopes Maliana, segunda ne’e entusiazmu vizita muzeu Memoriál Munisipál Bobonaro.
Estudante ESG Dom Martinho da Costa Lopes Maliana, Macario Lobato, kontente tanba bele hetan oportunidade vizita no lee direita livru istória ba luta libertasaun nasionál, hahú hosi 1974-1999 ne’ebé prezerva hela iha muzeu refere.
Notísia relevante: Muzeu Bobonaro sei implementa atvidade tolu iha 2024
“Ami hakarak mai vizita fatin ne’e, atubele hatene kle’an liután kona-bá istória uluk ninian, tanba iha eskola ami-nia matéria istória dalaruma istória kona-bá funu ladún kompletu ida,” nia informa ba jornalista sira iha muzeu Memoriál Munisipál Bobonaro.
Koordenadora Muzeu Memoriál Munisipál Bobonaro, Marciana Gouveia Leite, esplika vizita ne’e nu’udar planu no atividade muzeu nian, ho objetivu atu fasilita estudante sira asesu dokumentu istória Timor-Leste nian, espesialmente munisípiu Bobonaro.
“Sira mai, ami esplika ona kona-bá lala’ok exibisaun iha muzeu laran no mós narativu sira-ne’ebé ami entrevista sobre tinan kotuk ho tinan ne’e, ita mós sei fó konvite ba eskola seluk atu mai vizita, fulan ida ita fó oportunidade ba eskola ida,” nia katak.
Profesór ESG Dom Martinho da Costa Lopes Maliana, Juvencio de Jesus, espera liuhosi vizita ne’e bele apoia referénsia profunda ba atividade pedagojía liuliu disiplina istória.
Nia argumenta, aldende adapta-aan ho situasaun siénsia teknolojia, estudante sira bele hatene istória pasadu ba prosesu luta libertasaun nasionál.
“Sira -ne’e mak juventude miléniu, entaun sira tenke hatene istória kona-bá nasaun, istória kona-bá ukun-aan, istória kona-bá eroi sira-nia no istória kona-bá prosesu luta armada, tanba ukun-aan ne’e la’ós nasaun seluk mak fó ita,bmaibé ukun-aan ne’e ita hetan liuhosi prosesu naruk,bprosesu ida-ne’ebé ema barak mate, hetan sofrementu no ema hotu-hotu ho nia konsiénsia luta ba ukun-aan,” nia katak.
Enkuantu estudante ne’ebé vizita muzeu ne’e hosi klase 12 ano ho totál ema na’in 40-resin.
Notísia relevante: Governu inaugura Muzeu Memoriál Munisipál Bobonaro
Jornalista: Sergio da Cruz
Editór: Evaristo Soares Martins
