COVALIMA, 11 marsu 2024 (TATOLI) – Estensionista sira iha Covalima tenke iha toos pilotu hodi sai ezemplár no presiza funsiona serbisu halo atendimentu ba agrikultór sira, hatete Prezidente Autoridade Munisípiu Covalima, Miguel Armada Cardoso.
“Ha’u fó hanoin ba estensionista sira katak funsiona imi-nian serbisu, labele tuur de’it iha fatin, tenke iha toos pilotu hodi sai ezemplár ba agrikultór sira iha Covalima”, PAM Covalima reitera, ohin.
Atu observa serbisu estensionista sira maka PAM Covalima sei kria kalendáriu atu hala’o vizita bá postu administrativu no suku sira ne’ebé funsionáriu sira destaka ba, bainhira sira laiha toos pilotu maka nia sei submete relatóriu ba superiór.
“Estensionista sira ne’ebé mak Governu halo rekrutamentu hodi destaka ona bá suku sira atu fó asisténsia téknika ba agrikultór sira oinsá mak atu prátika agrikultura ho di’ak”, dehan.
Diretór Servisu Munisipál Agrikultura Covalima, Lino Magno, hatete estensionista iha na’in-30 ne’ebé mak destaka ba kada suku 30 iha munisípiu refere. “Ita-nian estensionista sira-nian serbisu mak oinsá atu fó asisténsia téknika ba toos no natar-na’in sira hodi hasa’e produsaun iha rai-laran”, esplika.
Tuir planu, Servisu Munisipál Agrikultura Covalima sei rekrutra estensionsita na’in-ualu hodi troka estensionista ne’ebé mak ho idedade reforma no balun mate ona.
Notísia relevante: PAM Covalima tau importánsia ba programa haat
Jornalista: Celestina Teles
Editora: Maria Auxiliadora
