Governu lansa kompetisaun Agrikultura 2024 iha Bobonaro
BOBONARO, 12 marsu 2024 (TATOLI)-Governu liuhosi Ministru Agrikultura, Pekuária, Peska no Floresta, Marcos da Cruz, tersa ne’e hamutuk ho Autoridade Munisipál Bobonaro lansa kompetisaun Agrikultura tinan 2024 ho tema “Tempu ona, mai ita hasa’e produsaun foos ho sistema K1K2.”
Programa foun ho sistema Demoplot ne’e inísia hosi Kámara Komérsiu Industria Timor-Leste (CCI-TL, sigla portugés) no programa ne’e lansa simbolikamente iha postu administrativu Maliana, munisípiu Bobonaro maibé sei abranje ba territóriu nasionál.
Agrikultura, Pekuária, Peska no Floresta, Marcos da Cruz, agradese no apresia ba CCI-TL tanba bele iha inisiativa atu apoia dezenvolve setór agrikultura iha Timor-Leste.
Notísia relevante: CCI-TL koopera ho KADIN Indonézia dezenvolve setór agrikultura
“Ida-ne’e inovasaun ida importante tebes, bele motiva ita-nia agrikultór sira, alende prodús bodi haan no hetan osan. Ida+ne’e mós atu motiva sira tanba sei hetan prémiu, programa ne’e diferente ho sira liubá, tanba nia kritéria sé mak prodús ho di’ak,bkualidade no kontinuidade, sustentável, kuda dala-rua ka dala-tolu,” nia hateten iha sede suku Raifun, postu administrativu Maliana
Prezidente CCI-TL, Jorge Serrano, hateten programa ne’e implementa atu motiva agrikultór sira badinas halo natar hodi hasa’e produsaun hare, nune’e labele dependensia ba foos importasaun hosi estranjeiru.
Serrano argument,a ho sistema K1K2 sei garante kuantidade produsaun hare aumenta,btanba kuda dala ida bele koilleta dala-rua.
“Ita ko’a iha leten de’it hasai hare, hatama fali bee, halo tratamentu, hare ne’e duni mak sei fó fali isin, maibé ita-nia agrikultór sita tenke halo kontrolu ho másimu tuir SOP ne’ebé iha, ita halo programa ne’e atubele responde ba nesesidade rai-laran,ntanba orientasaun Primeiru Ministru atu hapara importasaun fos hosi rai-li’ur,” nia dehan.
Vice Prezidente CCI-TL ba Asuntu Agrikultura, Rui Castro, esplika programa ne’e hahú rejistrasaun ohin (12/03) to’o loron (03/04).
Nia sublina CCI-TL mos sei husu apoia hosi MAPPF atu apoia Tratór hofi fila rai sira ne’ebé preparadu atu tuir kompetisaun.
Aldende ne’e sei hetan mos apoia asistensia teknika hosi PT Pretrosida Gresik hosi Indonezía.
Vice Prezidente CCI-TL ne’e reforsa, kompetisaun ne’e sei loke kada tinan ba agrikultór individu no grupu ho nia kritéria kuda hare másimu ektare lima.
“Ita-nia kompetisaun ne’e la mai ho hakerek proposta, maibé kompetisaun iha natar laran, imi sei aprezenta ai-suak, enxada, katak iha natar laran mak barak liu durante loron 100-resin, hahú hosi fila-rai, prepara fini, kuda, adubu, manutensaun to’o kolleta,” nia katak.
Rui haklaken, prosesu evaluasaun ba kompetisaun ne’e hala’o hosi ekipa CCI-TL ne’ebé sei halo loron 36 depois hare refere kuda.
“Loron 36 atu hetan ema na’in-20 ne’ebé diak, loron 64 sira na’in 20 ne’e sei hetan deit na’in-10 ne’ebé di’ak, hosi na’in-10 ne’e depois kolleta sei hetan na’in-tolu ne’ebé di’akliu, ne’ebé sei foti deizaun finál hosi ekipa Juri hosi MAPPF ho CCI-TL tuir rezultadu ne’ebé iha batar,” nia fó hanoin agrikltór sira.
Nia subliña, liuhosi kompetisaun agrikultór ne’ebé sai vensidór sei hetan prémiu tratór no pakote atu halo natar, hetan Oportunidade asesu fasillidade kréditu hosi Banku Nasionál Komersiu Timor-Leste (BNCTL, sigla portugues) hodi kontinua halo invetimetu ba setór agrikultura liuliu hasa’e produsaun hare.
Enkuantu programa ne’e apoia hosi PT Pretrosida Gresik, Heneyken no Banku Nasionál Komérsiu Timor-Leste.
Notísia relevante: CCI-TL hahú mobiliza emprezáriu investe iha setór agrikultura hodi hamenus importasaun
Jornalista: Sergio da Cruz
Editór: Evaristo Soares Martins
